Манай улсад зургадугаар сарын 12, 13-нд зохион байгуулах “Алтай дамнасан тогтвортой байдлын яриа хэлэлцээ-Жендэрийн эрх тэгш байдал ба тогтвортой хөгжил” олон улсын чуулга уулзалтын талаар мэдээлэл өглөө.

Энэ үеэр УИХ-ын Тамгын газрын Гадаад харилцааны хэлтсийн дарга Ц.Жамбалдорж ярихдаа, “Алтай дамнасан тогтвортой байдал гэрээ хэлэлцээр” чуулга уулзалтын гуравдагч гол сэдэв болох Алтай судлалын талаар ярихад, өнгөрсөн онд БНСУ-д болсон “Номхон далай дамнасан тогтвортой байдлын яриа хэлэлцээ” чуулга уулзалтад УИХ-ын дарга Г.Занданшатар, УИХ-ын гишүүн ХНХ-ын сайд Х.Булгантуяа нар үндсэн илтгэгчээр оролцож байсан. Энэ жилийн энэ хурал нь УИХ-ын даргын санаачилгаар Монгол Улсад зохион байгуулагдаж байгаа.

Алтай дамнасан гэдэг нэрийн хүрээнд болж байгаа учир нь УИХ-ын даргын хувьд санаачлахдаа Номхон далай дамнасан орнууд төдийгүй Алтай дамнасан улс орнууд болох Монгол, Турк, Казахстан, Киргизстан, Узбекистан, Азербайжан гээд эдгээр орны эрдэмтэн судлаачдыг урьж оролцуулан Алтай судлал өнөөдөр ямар түвшинд байгаа талаар эрдэмтэн судлаачдын хүрээнд хэлэлцүүлэх санал дэвшүүлсэн. Энэхүү уулзалтыг хамтран ажиллагч байгууллагууд зөвшөөрч энэ жил Улаанбаатарт болж буй чуулга уулзалтыг “Алтай дамнасан” гэсэн энэ сэдвийн хүрээнд болгоё гэж тохирсон.

Монгол хэл маань Алтай хэлний аймагт багтдаг. Алтай хэлний аймаг бол түрэг, манж, солонгос, япон гээд олон том хэлний аймагтай гарал үүсэл нэг гэж үздэг. УИХ-ын дарга Г.Занданшатар Урал-Алтай язгуурын хэлний улс орнуудыг оруулсан нийгэмлэг байгуулах нь зүйтэй юм уу гэсэн асуудал хөндөж байсан. Тэгэхээр энэ удаагийн чуулга уулзалтын хүрээнд эрдэмтэн судлаачид энэ асуудлыг ярьж хэлэлцэх байх гэж бодож байна. Энд зөвхөн Алтай дамнасан улс орнуудын түүх, соёл, урлаг гээд бүх талын тогтвортой хамтын ажиллагаа, цааш цаашдаа хамтран ажиллах ёстой юм байна гэсэн асуудлын хүрээнд хөндөн ярилцах гэж байна” гэв.