2030 он гэхэд дэлхий нийтээр бог малын мялзан өвчнийг бүрэн устгахаар зорьж байгаа бол 2027 он гэхэд бог малын мялзан өвчний эсрэг вакцинийг зогсоож, илүү хүчтэй аргаар тэмцэх аж. Дархлаажуулалт үр дүн муутай тул дөрвөн жилийн дараагаас энэхүү өвчний голомт үүсвэл устгалын арга хэмжээ авах нь ээ. Манай улс уг зорилттой хөл нийлүүлэх нь гарцаагүй. Энэ өвчнийг хянаж устгах, оношилж тандан тусгаарлах замаар арга хэмжээ авч байгаа хэмээн Мал эмнэлэгийн ерөнхий газраас сэтгүүлчдэд мэдээлэл хийв.

Мялзан өвчтэй тэмцэхэд дан ганц вакцинжуулах бус малчид мэдээлэлтэй байж, сонор сэрэмжээ алдахгүй, хариуцлагатай байх нь чухал болохыг онцоллоо.

Мялзан өвчний голомт үүссэн бүс нутгаас малчид шилжилт хөдөлгөөн, отрын нүүдэл хийсэн санаатай болон санамсаргүй тохиолдол гардаг нь өвчин тэлэх суурь шалтгаан болдог. Өвчтэй малыг эрүүл малтай нийлүүлсэн малчдад хариуцлагын арга хэмжээ авч байгаа гэв. Нэг жишээ хэлэхэд,

Ховд аймгийн Булган суманд гарсан шүлхий өвчний голомтын бүсээс хоёр ачааны машин дүүрэн малыг хорио цээрийн нөхцөлтэй үед мал эмнэлэгийн байгууллагад мэдэгдэх үүргээ умартан Баянхонгор аймгийн хоёр суманд тэрхүү өвчтэй малыг байршуулж, өвчнийг тэлсэн тохиолдол гурван шатны шүүх дээр шийдвэрлэгдэж байна.

Улмаар мал амьтны өвчлөл бүртгэгдээгүй байсан Баянхонгор аймгийн хоёр сум хариуцлагагүй малчин, иргэний балгаар гоц халдвартай бүс нутаг болжээ. Тэрхүү гоц халдвартай мал тээвэрлэсэн иргэнийг учруулсан хохирол 70-80 сая төгрөгт хүрсэн байна. Бог малын мялзан өвчин мал амьтны өвнөөс хамгийн хор хөнөөлтэй нь. Бог малын мялзан өвчнөөр бог малаас гадна бөхөн, хар сүүлт, цагаан зээр, аргаль, янгир зэрэг нэлээд хэдэн төрлийн зэрлэг ан амьтад өвчилдөг байна.