Монгол Улсын 24 дэх аварга П.Бүрэнтөгсийн санаачлан, "Бидний бүрэн Монгол ТББ"-аас хэрэгжүүлж буй "Бүрэн Монгол гэр" төсөл Өмнөговь аймагт амжилттай хэрэгжлээ.

Уг төсөл нь 2022 оны наймдугаар сарын 1-нд Увс аймагт эхэлсэн бол 2023 оны наймдугаар сарын 15-ны өдөр Өмнөговь аймагт сүүлийн гэр гардуулах ёслолын ажиллагаа болж, Өмнөговь аймгийн Номгон сумын иргэн Ц.Буянмөнхийн гэр бүлд иж бүрэн тавилгатай, зургаан ханат өргөө гэр гардуулав.

Энэхүү төсөлд хамрагдсан сүүлийн айлаар Ц.Буянмөнх, Г.Золзаяа нар шалгарсан билээ. Тэд оюутны нэг ангид сурч байсан бөгөөд 2017 онд Олон Улсын Эдийн Засаг, Бизнесийн Их Сургуулийг гаалийн байцаагч, татварын ажилтан мэргэжлээр төгсөж, хамт амьдраад зургаан жил болж, нэг охины аав ээж болсон, эгэл даруу, хөдөлмөрч залуус юм.

Гэрийн эзэн Ц.Буянзаяа нь Өмнөговь аймгийн Номгон суманд төрж өссөн. Айлын том хүү тэрбээр их сургуулиа төгсөөд гаальд ажиллана гэж мөрөөддөг байсан ч сумандаа ирж ажиллах хүсэлдээ хөтлөгдөн Өмнөговь аймгийн Хөдөлмөр халамж үйлчилгээний газрын Номгон сумын Хөдөлмөр эрхлэлт, халамжийн асуудал хариуцсан мэргэжилтнээр тав дахь жилдээ ажиллаж байна. “Хөдөө орон нутагт амьдрах залуус багасаж байгаа энэ үед сум нутагтаа ажиллаж, хөгжүүлж цэцэглүүлэх нь юунаас ч чухал санагдаж, хайртай хүнээ үлдээгээд хүртэл явсан шүү дээ” хэмээн өгүүлэх энэ залуу ажилдаа хичээнгүй тууштай, төлөв даруу, эелдэг боловсон нэгэн болохыг ажлын хамт олон, нутгийн иргэд онцолж байлаа.

Харин гэргий Г.Золзаяа нь Сэлэнгэ аймагт төрж, Дархан-Уул аймагт өссөн ч сэтгэлээ даган говьд амьдрах зоримог шийдвэр гаргаж өдгөө Номгон сумын Төрийн банканд теллерээр ажиллаж байна. Тэрбээр “Нэг жил орчим хайртай хүнээсээ хол байгаад тэсэлгүй хүрээд ирсэн. Говьд эхэндээ дасахгүй хэцүү байсан ч одоо яг л говийн хүн шиг энэ нутагтаа ээнэгшиж, цаашид эндээ амьдрах бодолтой байгаа. Өмнө нь аавтайгаа хамт ногоо тарьдаг байсан тул энд гэр бүлээрээ ногоо тарьж, хүлэмжтэй болохыг зорьж байгаа” гэж итгэл дүүрэн ярьж байлаа. Мөн гэртээ хүүхдээ харах хугацаанд маникюр хийж сурсан энэ бүсгүйгээр нутгийн охид эмэгтэйчүүд зорьж ирэн хумсаа будуулдаг гэнэ.

Ц.Буянзаяагийнх Хөдөлмөр халамжийн ажилчдын байранд амьдардаг. Тэд ийнхүү өөрсдийн гэр оронтой болж, өрх тусгаарласандаа ихэд баярлаж, олны итгэлийг алдалгүй улам хичээн хөдөлмөрлөхөө амлав.

"Бүрэн Монгол гэр" гардуулах ёслолд нутгийн ард иргэд болон аймаг, сумын удирдлагууд оролцож, “Бүрэн Монгол” төслийн хүрээнд сум орон нутгийн зүгээс хашаа барих газар болон хашааг нь бүрэн барьж тохижуулах, өрх дэмжих төсөл хөтөлбөрт хамруулахаар болсон нь залууст улам бүр урам өгч, нутагтаа итгэл дүүрэн амьдарч, зорилго дүүрэн ажиллах боломжийг бүрэн дүүрэн бүрдүүлж өглөө

Зорилтот биш зорилготой гэр бүлийг дэмжиж, зөв хандлага, зөв жишгийг нийгэмд түгээх зорилготой энэхүү үйл хэргийг нутгийн иргэд, хөдөлмөрчид онцгойлон сайшаан дэмжиж, төслийн баг хамт олонд чин сэтгэлийн талархал илэрхийлж байлаа.

Олон залуусын сэтгэлд гал нэмж, харцанд гэрэл нэмсэн “Бүрэн Монгол” төслийн үйл ажиллагаа ийнхүү 21 дэх аймагтаа амжилттай хэрэгжив.