Азийн сүүн хүчлийн бактер судлаачдын холбооны “Сүүн хүчлийн бактерт суурилсан ашигт бактер/пробиотик/-ийн ирээдүйн чиг хандлага” сэдэвт олон улсын 13 дугаар бага хурлыг 8 дугаар сарын 16-18-ны өдрүүдэд Монгол улсад зохион байгуулж байна.
Тус холбоо нь 13 гишүүн оронтой бөгөөд 2002 оноос хойш энэхүү хурлыг жил бүр зохион байгуулсаар иржээ.
Монголын уламжлалт эсэг идээ буюу айраг, гүүний саам, хоормог зэрэг цагаан идээний өнө эртний түүхтэй учраас манай улсад тус чуулга уулзалтыг зохион байгуулах саналыг өнгөрсөн оны хурлын үеэр тавьжээ.
Тус хуралд 12 орны 70 гаруй тэргүүлэх эрдэмтэн, судлаачид оролцож, үндсэн болон салбар 5 симпозиумд илтгэл хэлэлцүүлж байна.
Сүүн хүчлийн бактери агуулсан пробиотик нь эмийн бүтээгдэхүүнээс ялгаатай тал нь биеийн дархлааг идэвхжүүлж, гэдэсний үйл ажиллагааны хямралтай холбогдсон төрөл бүрийн эмгэгүүдийг байгалийн жам ёсны дагуу эмчлэн сэргийлэх боломжийг олгохын зэрэгцээ шим тэжээлийн эх үүсвэр болдог. Пробиотикийн грамм тутамд нь хэдэн тэрбум хүртэл тоогоор агуулагдах сүүн хүчлийн бактери нь бидний хоол боловсруулах замын шүүрлүүдэд тэсвэртэй бөгөөд гэдэсний хананд бэхлэгдэн үржиж, хүчиллэг орчин үүсгэхийн зэрэгцээ биологийн өндөр идэвхтэй нэгдлүүд ялгаруулж, дээр өгүүлсэн эмгэг төрүүлэгчдийн тоо хэмжээ, үйл ажиллагааг нь дарангуйлан хязгаарлаж, бичил экологийн тэнцвэрийг хангаж, биеийн дархлааг сайжруулдаг" онцлогтой ажээ.
Дэлхий нийтээр антибиотикийн зохисгүй хэрэглээнээс аль болох татгалзаж, пробиотикийн ашиг тусыг мэдэрч, түүний хэрэглээ эрчимтэй өсөхийн хэрээр энэ чиглэлийн судалгаа үйлдвэрлэл гүнзгийрэн хөгжсөөр байна.
Манай орны эрдэмтэн судлаачдын анхааралын төвд орж, удаа дараагийн гадаад, дотоодын төсөл, хөтөлбөрт гүйцэтгэгчээр ажиллах болсноор ХААИС, МЭХ-ийн дэргэд Пробиотикийн судалгааны баг, хамт олон, боловсон хүчин, багаж төхөөрөмжийн хангамж бүрдэж улмаар Пробиотикийн судалгаа үйлдвэрлэлийн төвтэй болж пробиотикийг үйлдвэрлэн хэрэглээнд нэвтрүүлжээ.
Уг хурлыг БШУЯ, ХХААХҮЯ, Мал эмнэлгийн ерөнхий газар, ХААИС, МЭХ-ийн эрдэмтэн, судлаачид, Aзийн пробиотик судлаачдын холбоо болон "АПУ Дэйри" ХХК хамтран зохион байгуулж байна.
Эх сурвалж: Мал эмнэлгийн ерөнхий газар
