Хичээлийн шинэ жил эхэлж буйтай холбогдуулан өнгөрсөн наймдугаар сарын 26-ны өдрөөс энэ сарын 14-ний 20 цаг хүртэл тээврийн хэрэгслийг улсын дугаарын тэгш, сондгойгоор ялган замын хөдөлгөөнд оролцуулах зохицуулалт хийсэн билээ.  Дугаарын тэгш, сондгойгоор замын хөдөлгөөнд оролцсон өдрүүдэд шүүмжлэх нэгэн ч, бас сайшаах нэгэн ч байлаа.

Замын хөдөлгөөний ачаалал тодорхой хэмжээнд буурч, тэр хэрээрээ сургууль, цэцэрлэгийн хичээл эхлэхэд нийтийн тээвэр ч хүн ихтэй болсон. Тэгвэл өнөөдөр нийтийн тээвэр хоосон шахуу болж, зам дээрээ "пиг" болов.

Бид хуучин автобусныхаа ямар болохыг мэднэ. Хар утаа хаядаг, хүйтэн, агааржуулагч ч байхгүй гээд тоочих зовлон их. Ингэж явснаас хувийн унаандаа тухтай, дулаан, зүдгүүр багатай очсон нь дээр гэх ч биз. Гэхдээ...

Насжилт нь дуусаж буй автобусыг халж, нийтийн тээврийн хүртээмжийг нэмэх, мөн шинэчлэх ажлуудыг шат дараатайгаар хийж буй.

Нэгэнт улсаас төсөв мөнгө гаргаад парк шинэчлэл хийж байхад ард иргэд нь дэмжээд нийтийн тээврээр зорчиж үзвэл ямар вэ? Гэвч энэ байдлаараа автобусаар хөл дүүжлэх хүн олдохгүй бололтой. Гэр бүлийн хоёр нэг, нэг машин унаж гараад уулзвар дээр хамтдаа түгжирдэг болсон гэвэл дэгсдүүлж байгаа ч хэрэг бус шүү дээ. 

Есдүгээр сар гарав уу, үгүй юу бороотой сэрүүхэн өдрүүд ирлээ. Үүнтэй залгаад өвлийн сарууд ирнэ. Хүн бүр машинтай байгааг буруутгах арга даанч үгүй. Бусдын лаагаа иднэ үү, луувангаа иднэ үү бидэнд ямар хамаа байна гэж нийгмийн амьтад нэг нэгнээсээ асуудлыг холдуулдаг.

Болж байгааг болж байна, болохгүй байгааг болохгүй байна гэж хэлэхээсээ аль эрт "залхчихсан". 

Өдгөө биднийг зам дээр түгжирч, бухимдах чилийсэн олон сар хүлээж байна. Гэлээ гээд ямар нэгэн зохицуулалтыг бид хүлээж авахаасаа нэгэнт өнгөрчээ. Тэгш, сондгойгоор явуулсан өдрүүдэд яаж "паянтаж" байсныг харсан биз ээ. 

Тавтай морилно уу...

М.Жаргал