“Монголын төмөр зам” ТӨХК-ийн төвийн болон “Цогтцэций өртөө”, “Төмөртэй өртөө”-ний хамт олны төлөөллийг хамруулан тус компанийн 2023 оны үйл ажиллагааг дүгнэн хэлэлцэх, ирэх оны зорилтоо танилцуулах хамт олны хурлыг зохион байгууллаа.
“Монголын төмөр зам” ТӨХК нь 2023 онд “Тавантолгой-Зүүнбаян” чиглэлийн 416,1 км төмөр замыг байнгын ашиглалтад хүлээн авч энэ оны байдлаар 1,8 сая тн ачаа тээвэрлэснээс 409 мянган тн сайжруулсан шахмал түлшний түүхий эд, 50 мянган тн нефтийн бүтээгдэхүүний тээвэрлэлтийг зохион байгуулж нийгмийн хариуцлагын хүрээнд хувь нэмрээ оруулан ажиллаж байна.
Энэ үеэр “Монголын төмөр зам” ТӨХК-ийн Гүйцэтгэх захирал Б.Отгонсүх хэлсэн үгэндээ:
“... 2023 онд “Монголын төмөр зам” ТӨХК-ийн хувьд хүн бүр дор бүрнээ хичээн ажиллаж, ажлын чанар, үр ашгийг нэмэгдүүлсэн жил боллоо. Удирдлагын зүгээс сар тутамд “Төмөртэй өртөө”, “Тавантолгой-Зүүнбаян” чиглэлийн төмөр замын “Цогтцэций өртөө” болон зөрлөгүүдэд газар дээр нь ажиллаж, нөхцөл байдалтай танилцан тулгамдсан асуудлуудыг шийдвэрлэж ажиллалаа. Бид энэ онд хоёр сая орчим тн ачаа тээвэрлэлтийг зохион байгуулж улс орныхоо зам, тээврийн салбарт зохих хэмжээний хувь нэмрээ оруулан ажиллалаа. Энэ бүхэн нь хамт олон та бүхний хүч хөдөлмөр, хичээл зүтгэлийн үр дүн юм. Ирэх онд бид “Тавантолгой-Зүүнбаян” чиглэлийн төмөр замаар 3,4 сая тн ачаа тээвэрлэх зорилго тавин ажиллаж байна.
2024 онд Засгийн газрын Шинэ сэргэлтийн бодлого-Боомтын сэргэлтийн хүрээнд хилийн боомтуудыг төмөр замаар холбох ажлыг үргэлжлүүлэхийн зэрэгцээ Орос-Монгол-Хятад гурван улсын “Эдийн засгийн коридор байгуулах хөтөлбөр”-т тусгагдсан эдийн засаг, стратегийн онцгой ач холбогдол бүхий Арцсуурь-Нарийнсухайт-Шивээхүрэн, Чойбалсан-Хөөт-Бичигт, Сайншанд-Баруун-Урт-Хөөт чиглэлийн төмөр замын төслүүдийг эхлүүлэх их үүрэг хариуцлага та биднийг хүлээж байна. “Монголын төмөр зам” ТӨХК нь хөрш орнуудын төмөр замын хөгжил, дэвшилтэй уялдсан төмөр замын сүлжээг бий болгох эрхэм үйлсэд тэмүүлж улс орны эдийн засгийг хүчирхэгжүүлэх төмөр замын салбарын хөгжилд бодит хувь нэмрээ оруулах үндэсний төмөр замын компани болох зорилт тавин 2024 оноо угтаж байна.” хэмээн онцлов.
Мөн энэ үеэр хамт олноо манлайлан ажилласан ажилтнуудыг шагнан урамшууллаа. Тухайлбал:
Хүндэт төмөр замчин цол тэмдэг
Засварын хүлээн авагч Б.Уянгабадрал, Цахилгааны монтёр Ч.Алтангэрэл, Тээврийн хяналтын байцаагч Н.Чингис
Онц тээвэрчин цол тэмдэг
Жолооч Б.Нямхуяг, П.Энхбаяр
ЗТХЯ-ны Жуух бичиг
Механизмын машинч Г.Гомбо, Н.Мөнх-Учрал, Бригадын дарга Б.Пүрэвсүх, Цахилгаанчин Н.Пүрэвбат, ХАБЭА-н мэргэжилтэн Ч.Мөнхцацрал, Захиргаа, хүний нөөцийн хэлтсийн дарга Д.Амаржаргал
ТӨБЗГ-ын Хүндэт жуух бичиг:
Хөдөлгөөн зохион байгуулалтын хэлтсийн дарга Г.Шижирбаатар, Инженер технологийн хэлтсийн дарга Б.Сүхчулуун, Төлөвлөлтийн мэргэжилтэн Б.Наранбаатар,
“Хөдөлмөр нийгмийн хамгааллын яам”-ны Жуух бичиг
Тээвэрлэлтийн үйл ажиллагаа хариуцсан инженер Э.Эрчист, Вагоны ашиглалт хариуцсан инженер О.Отгонпүрэв, Техникийн нөхцөл хариуцсан инженер Б.Мэнд-Амар, Трейлерийн жолооч Д.Төрбат
Монгол улсын харилцаа холбооны зохицуулах хорооны Жуух бичиг:
Программ хангамжийн инженер Э.Энхбаяр, Дохиоллын инженер С.Тэмүүжин нарыг тус тус шагналаа.
