Долоон жилийн өмнө монгол эмэгтэй Ш.Алтантуяа Малайзад амиа алдсан ч одоо хүртэл хэргийн буруутнуудыг олоогүй байна. Хэн түүнийг хөнөөснийг мэдэхийг түүний гэр бүлээс элэг нэгт монголчууд хамгийн ихээр хүсч буй. Гэхдээ малайзууд монголчуудаас ч илүүтэйгээр хэн буруутайг тогтоохыг хүсдэг  хэмээн тус улсын хэвлэлүүд бичжээ. Учир нь энэ хэрэгт Малайзын өнөөгийн Ерөнхий сайд Нажиб Разак холбоотой гэгддэг нь ийнхүү олны анхаарлыг татдаг байна.

Тэгвэл нэгнийхээ төлөө яваа монгол эмэгтэйчүүд Ерөнхий сайд Нажиб Разак болон түүний эхнэр Росмах Мансор нарыг шийдэгдээгүй хэрэгт хариу өгөхийг зоригтойгоор шаарджээ. Энэ нь тэдний анхаарлыг татаж, дургүйг нь хүргэсэн талаар гадны хэвлэл бичжээ.

    Энэ сарын долооны өдөр Малайзын нийслэл Куала Лумпур хотноо болсон Дэлхийн эмэгтэйчүүдийн чуулга уулзалтын үеэр Монголын эмэгтэйчүүд тус улсын Ерөнхий сайд болон түүний эхнэрээс хариулт нэхсэн нь Малайзад олны дэмжлэгийг авчээ.

    Монголын төлөөлөгчид Малайзын Засгийн газар, Засгийн газрын тэргүүнийг долоон жилийн өмнө тус улсад амиа алдсан монгол эмэгтэй Шайрийбуугийн Алтантуяагийн домогт хэрэгт хариулт өгөхийг шаарджээ.

    Монголын эмэгтэйчүүдийн холбооны ерөнхийлөгч Ж.Эрдэнэчимэг чуулганыг сурвалжлахаар очсон хэвлэлүүдэд “Ш.Алтантуяагийн хэргийг дахин шалгаж эхлэх хэрэгтэй. Энэ шалгалт түүний үхэлд хэн буруутай болохыг ч хэлж өгөх ёстой” хэмээн хэлжээ. Мөн тэрээр Малайзын Эмэгтэйчүүд, Гэр бүл, Олон нийтийн хөгжлийн яамыг тус асуудалд онцгой анхаарал тавихыг хүсчээ.

Дэлхийн 70 гаруй орны төлөөлөгчийн дунд монголоо гэсэн эмэгтэйчүүд ядаж талийгаач Ш.Алтантуяагийн эхийн хайрыг мэдрэлгүй өсч буй хоёр хүүгийн төлөө хариуцлага хүлээж хэрэгтнүүдийг олон ёстой гэсэн байна. Мөн түүний хүүхдүүдэд санхүүгийн тусламж хэрэгтэй байгааг ч хэлсэн байна. 

    Монголын эмэгтэйчүүдийн холбооны гүйцэтгэх захирал Ш.Ариунаагийн хэлснээр төлөөлөгчид Ш.Алтантуяагийн аавтай уулзсаны дараа чуулганд түүнийг төлөөлж мессеж хүргэхээр ирсэн байна. Шайрийбуу зээ хөвгүүдээ өсч том болоход ээж нь чухам яагаад хорлогдсоныг хэлэх хариулттай байхыг хүсчээ.

    Малайзад амьдарч, орчуулагчаар ажиллаж байсан Ш.Алтантуяа 2006 онд шумбагч онгоцны худалдаанд туслаж байгаад амиа алдсан юм. Долоон жилийн өмнө болсон энэ хэрэг түүний биед тэсрэх бодис зүүгээд дэлбэлсэн гэхээс өөр эрэн сурвалжилсан зүйл, нотолгоогүй яваа гэхэд хилсдэхгүй. Түүний хэрэгт малайзууд тухайн үед Батлан хамгаалахын сайд асан, Ерөнхий сайд Нажиб Абдул Разак, түүний итгэлт анд Абдул Разак Багинда нарыг сэжиглэдэг. Тухайн үед Нажиб Абдул Разакын бие хамгаалагчаар ажиллаж байсан Азилах Хадри Сирул Азхар Умар нарыг ч энэ хэрэгт сэжиглэдэг.

    Ш.Алтантуяаг Нажибтай сексийн харилцаатай байсан хэмээн хувийн мөрдөн байцаагч Баласубраманиам мэдээлснийг монгол эмэгтэйн нэр хүндийг унагах зорилготой ч байж магадгүй хэмээн үздэг. Харамсалтай нь тэрээр хэргийн талаар жинхэнэ үнэнийг мэдээлнэ гэж мэдэгдсэнийхээ дараа буюу өнгөрсөн гуравдугаар сард амиа алджээ.

    Манай улсын гэмт хэргийн аймшигт сүлжээг илтгэж буй Ш.Алтантуяагийн хэргийг шийдэж, буруутныг шийтгэсэн цагт л түүний сүнс амрах болно хэмээн “Malaysiakini” сайтын уншигчид бичиж байна.