Хэдхэн хоногийн өмнө Бостон хотын террорист 19 настай Жохар Царнаевын зураг “Rolling Stone” сэтгүүлийн нүүрэнд гарсан нь олны хэл амийг дагуулсан. Тэгвэл түүний дараагийн шуугиант зургууд хэдхэн цагийн өмнө интернэтэд тавигдсан нь ихээхэн шуугиан дэгдээгээд байна.

АНУ-ын цагдаагийн газрын зурагчин Жохар Царнаевын “арай л дэндүү” гэмээр зургуудыг авсан байна. Тэрээр Жохар Царнаевын духанд винтов бууны байны улаан гэрлэн тэмдэг тусгаж байгаад зургуудыг нь дарсан байжээ.

Цагдаагийн зурагчин, түрүүч Шон Марфи өөрийнх нь дарсан зургууд алан хядагч этгээд ямар царайтай байдгийг харуулахыг зорьсон гэжээ. Мөн тэрээр энэхүү зургуудыг “Rolling Stone” сэтгүүлийн нүүрэнд гарсан утгаа алдсан нялуун зургийг эсэргүүцэн дарсан тухайгаа ч ярьсан байна.

Түрүүч Шон Марфигийн хэлснээр энэ нь Бостоны дэлбэрэлт амиа алдаж, гэмтэж бэртсэн хүмүүсийн сэтгэлийг тайтгаруулах зургууд гэжээ. Тэрээр өөрийн дарсан зургуудаа “Rolling Stone” сэтгүүлийн дараагийн дугаарт хэвлүүлэхийг хүссэн ч эрх баригчид зохисгүй явдал хэмээн үзэж, хүчирхийллийг харж болохуйц зургуудыг ямар ч хэвлэлд гаргахгүй хэмээн мэдэгдлээ. Нийгмийн сүлжээ сайтын хэрэглэгчид ч цагдаагийн газрын харгис ажиллагааг буруутгаж байна.

Харин хоёр долоо хоногийн өмнө “Rolling Stone” сэтгүүлийн нүүрэнд гарсан Жохарын энэ зургийг хүмүүс мөн л эсэргүүцсэн юм. “Дэлбэлэгч” хэмээн нэрлэсэн тус өгүүлэлд ирээдүйтэй хүү хэрхэн террорист мангас болсон тухай Жанет Рейтмен гэгч сэтгүүлчийн хоёр сарын турш Царнаевын гэр бүл, найз нөхөдтэй уулзан материал цуглуулж бчисэн нийтлэл хэвлэгдсэн юм.

Хэдий тийм ч сэтгүүлийн нүүрний зураг гэмт хэрэгтэн биш олны хүндэтгэлийг хүлээсэн од шиг гарсан зураг, түүний оронд дэлбэрэлтэд амиа алдсан хүмүүсийн зураг байх ёстой хэмээн шүүмжлэхэд хүрчээ.

Ийнхүү Бостоны террористын зургууд олон улсын хэвлэлд маргаан өрнүүлээд амжлаа.

Өнгөрсөн дөрөвдүгээр сарын 15-ны өдөр Бостон хотод болсон дэлбэрэлтэд гурван хүн амиа алдаж, 260 гаруй хүн гэмтэж бэртсэн юм. Халдлагын хэрэгт Чечень гаралтай ах, дүү Царнаевыг буруутай хэмээн үзэж, баривчилсан юм. 26 настай Тамерлан Царнаев баривчилгааны үеэр нас барсан билээ. Харин 19 настай Жохар Царнаевыг өнгөрсөн долоо хоногт шүүсэн юм. Түүнийг 30 зүйл ангиар яллаж байгаа бөгөөд эдгээрийн 17 нь цаазаар авах ял оногдуулах төлөвтэй байна.