Мексикийн тэнгисийн цэргийн албан хаагчид АНУ-ын хилийн ойролцоо хар тамхи наймаалдаг дэлхийн хамгийн зартай бүлэглэлийн толгойлогчийг өнгөрсөн долоо хоногт баривчилсан билээ. Тэгвэл “Зетас” бүлэглэлийн 42 настай толгойлогч Мигуэл Анжел Тревино Моралес гэгч ямархуу харгис этгээд болох тухай барууны хэвлэлүүд онцолж байна.

Хэдхэн хоногийн өмнө зургийг нь олон нийтэд дэлгэсэн түүний хоч нь “Z40” бөгөөд “Зетас” бүлэглэлийн 40 дэх толгойлогч учраас ингэж нэрлэгдсэн байна. Дэлхийн хамгийн харгис наймаачин Z40 өөрт нь санаатайгаар болон санаандгүйгээр саад болсон хүмүүсийг хэрхэн тарчлааж байсныг гэрчлэх зургуудыг “SUN” сонин мэдээлжээ.

Мигуэл Анжел Тревино Моралес гэгч өөрөөс нь урвасан хүмүүсийг амьдаар нь хуйхалж хөнөөдөг байсан байна. Мөн бүхэл бүтэн тосгоны эрчүүд, эмэгтэйчүүд, хүүхдүүдийг нядлаж байжээ. Тэрээр бусдын толгойг авч буй, тамлан хөнөөж буй харгис үйлдлүүдээ хальсанд буулгаж олонд дэлгэн хүмүүст үзүүлж эрх баригчдыг басамжилдаг байсныг ч холбогдох албаны хүмүүс ярьсан байна.

• 2010 оны нэгдүгээр сарын 21-нд түүнийг мөрдөж байсан шүүгч эмэгтэй ингэж амиа алдсан юм. Эмэгтэйн хөлийг яг л мах шиг цавчсан байсныг цагдаа нар мэдээлж байжээ. Харин цогцос дээр нь Z үсэг тэмдэглээстэй байв.
• 2012 оны долдугаар сард тус бүлэглэлийн гишүүд Мигуэл Анжел Тревино Моралесын тушаалаар хууль бус наймааны “Синало” бүлэглэлийн гишүүний толгойг тасдаж буй бичлэгээ олон нийтэд цацжээ. Бичлэгт амиа алдсан эрэгтэйн нугасыг хэрхэн хувааж байгаа зэрэг хүний санаанд оромгүй үйлдлүүдээ хүртэл гаргасан байв.
• 2012 оны тавдугаар сарын 13-нд 43 эрэгтэй, зургаан эмэгтэйн зэрэмдэглэсэн цогцсыг Мексикийн Сан Жуан тосгоны ойролцоо хаясан байв. Энэ хэрэгт албаныхан “Зетас” бүлэглэлийг буруутгаж байсан ч нотлох баримт хангалтгүйн улмаас хариуцлага тооцож чадаагүй аж.
• 2012 оны хавар Z40-ийн хөлсөлсөн алуурчин хоёр эрэгтэй, хоёр эмэгтэйг харгисаар цаазалж буйгаа камерт бичиж интернэтэд цацжээ. Хамгийн гол нь энэ аймшигт явдлаас өмнө хохирогсдыг хүчирхийлж байгаа бичлэгийг цацахаа тэд мартаагүй байна.

• 2011 оны есдүгээр сард Моралесын захиалгаар 35 хүний цогцсыг Мексик хотын төвд олны нүдэн дээр өлгөсөн байв.

Мексикийн Засгийн газар 2006 онд хар тамхины хууль бус худалдаатай эрс тэмцэхээ мэдэгдсэнээс хойш Моралесын харгис үйлдэл газар авах болсон юм. Засгийн газарт хонзогносон энэ дайнд 2006 оноос хойш 80 мянга гаруй хүн золиослогдож энэ мэтчилэн харгисаар худалдаачны гарт амиа алджээ.

Мексикийн эрх баригчдын мэдээлснээр долоон жилийн өмнөөс хар тамхины тэмцэж эхэлснээр 230 бохир албан тушаалтанг авлигын хэргээр шоронд суулгаж, 3000 гаруй бохир цагдааг халсан байна. Мөн 63500 гэмт хэрэгтэнг баривчилж, 85551 зэвсэг илрүүлжээ.

Мексикийн хар тамхины бүлэглэлүүд нь Колумб, Перу, АНУ-ын хар тамхины худалдаачдад барааг зуучилдаг гол гүүр болдог байна.

Олон жил эрэн сурвалжилж байсан толгойлогчийг баривчлах үед тэрээр зургаан буу, хоёр сая гаруй ам.долларыг бэлнээр авч явсан байна. “Зетас” бүлэглэл “Gulf” гэмт хэргийн бүлэглэлийг атгах болсон нь Мексикийн эрх баригчдын санааг ихэд зовоож байсан юм. АНУ Мигуэл Анжел Тревино Моралесын тухай мэдээлэлд таван сая ам.доллар төлнө хэмээн зарлаж байсан билээ.

Мигуэл Анжел Тревино Моралест бүх насаар нь хорих ял олгоно хэмээн найдаж байна. Хаягийг нь нууцалсан шоронд хоригдож буй түүнийг хэзээ шүүх талаар мэдээлээгүй байгаа юм. Тэрээр баривчлагдсанаас хойш өөрийг нь шоронд ихээр тамлаж байна хэмээн ерөнхий прокурорт дөрвөн удаа өргөдөл гаргасан бөгөөд “Зетас” бүлэглэл ч толгойлогчдоо шоронд байх хугацаанд нь хуулийн хамгаалалт гаргаж өгөхийг албан ёсоор хүссэн байна. Харин энэ бол худал мэдээлэл байсан хэмээн шоронгийн байдалтай танилцсан прокурорууд мэдээлээд байна.