Өчигдөр өглөө Хятадын баруун хэсэгт газар хүчтэй хөдөлсөн билээ. Энэхүү гамшигт амиа алдагсдын тоо 89-д хүрсэн бөгөөд энэ тоо өсч магадгүй талаар “Сянхуа” агентлаг мэдээллээ. Ганьсу мужийн Ланзоу хотоос зүүн өмнө зүгт 177 км-т Чабу хотод болсон газар хөдлөлтөд 628 хүн гэмтэж бэртсэн байна.

Албаныхны мэдээлснээр газар хөдлөлтөд 123 мянган хүн өртсөн бөгөөд 31600 хүнийг хоргодох байранд нүүлгэн шилжүүлсэн гэлээ. Гамшигт 2000 гаруй орон гэр устсан бөгөөд 22500 барилга байшин эвдэрч сүйджээ. Мөн цахилгааны утсан холбоо тасарч, хурдны зам эвдэрчээ.

Хятадын Улаан загалмайн нийгэмлэгийнхэн 200 гаруй асар барьж хохирогсдод ахуйн хэрэглээ, хүнсээр туслаж байна. Аврах ажиллагаанд нйитдээ 6000 гаруй хүчнийхэн дайчлагджээ.

Тус бүс нутагт энэ долоо хоногт ихээр бороо орох тухай мэдээлж багйаа юм. Тиймээс хөрсний нуралт үүсч, амиа алдаж болзошгүй тул бэлтгэл хангаж байгаа аж.

АНУ-ын Геологийн судалгааны хүрээлэн газар хөдлөлт 5.9 баллын хүчтэй байсан хэмээн мэдээлсэн юм. Харин Ганьсу мужийн Сейсмологийн хороо 6.6 баллын хүчтэй байсан хэмээн мэдээлсэн билээ.