АНУ-ын Сенатын Гадаад харилцааны хороо өчигдөр өглөө Сирид цэрэг оруулах асуудлаар санал хураажээ. Ард түмнийхээ эсрэг химийн зэвсэг хэрэглэсэн хэмээн үзэж буй Сирийн эрх баригчдад хариу барин цэрэг оруулахыг Гадаад харилцааны хорооны гишүүд дэмжсэн байна.

Сенатын Гадаад харилцааны хороо Ерөнхийлөгч Обамаг Шведэд айлчлах үеэр санал хураажээ.

Конгресс болон олон улсын хамтралын хувь заяа дээсэн дөрөөн дээр байсан хэмээн эх сурвалжууд бичиж байна. Сэтгүүлчдэд хаалттай болсон нууц санал хураалт дээрх сэдвээр хэлэлцүүлэг хийснээр эхэлсэн бөгөөд Сенатын Гадаад харилцааны хорооны гурван гишүүний саналын зөрүүгээр асуудал шийдэгдсэн байна. Нийт 18 гишүүний 10 нь Сирийн Ерөнхийлөгч Башар Ал Ассадын эсрэг хүч хэрэглэх явдлыг дэмжсэн байна. Харин долоон гишүүн цэргийн дайралт хийхийг эсэргүүцсэн бол нэг гишүүн санал өгөхөөс түдгэлзжээ.

Ингэснээр АНУ-ын Сенатын Байнгын хорооны үүрэг гүйцэтгэдэг Гадаад харилцааны хороо Сирид хязгаарлагдмал цохилт өгөхийг дэмжсэн байна. хурлын албаны ёсны шийдвэрийг ирэх долоо хоногт танилцуулах аж.

АНУ-ын Төрийн нарийн бичгийн дарга Жон Керри санал хураах хурлын хэлэлцүүлгийн үеэр “Хэрвээ АНУ Сирид хөндлөнгөөс цэрэг оруулахгүй юм бол Ерөнхийлөгч Башар Ал Ассад дахин химийн зэвсэг хэрэглэх магадлал 100 хувь болно” хэмээн хэлснийг барууны хэвлэлүүд онцолж байна.

Цагаан ордон ч Сенатын хорооны шийдвэрт сэтгэл хангалуун байгаагаа илэрхийлжээ.

Өнгөрсөн сарын 21-ний өдөр Сирид химийн зэвсэг хэрэглэснээр 1400 гаруй хүн амиа алдсаныг АНУ-ын шинжээчид тогтоогоод байгаа юм.