АНУ-ын сенатч Жон МакКейн Оросын “Правда” сонинд амласан ёсоор нийтлэлээ хэвлүүлжээ. Тэрээр Ерөнхийлөгч Владимир Путины “Нью-Йорк таймс” сонинд Сирийн асуудлаар хэвлүүлсэн нийтлэлийн хариу болгон уг өгүүллийг бичсэн юм.

Жон МакКейн “Оросууд Путинаас илүү гавьяатай” өгүүлэлдээ Оросын төрийн тэргүүнийг дарангуй удирдагч, харгислагчдын нөхөр хэмээн хатуухан шүүмжилсэн байна.

Тэрээр В.Путиныг дарангуй удирдагч гэдгийг батлахдаа Оросын хуульч Сергей Магнитскийн жишээг татжээ. В.Путин болон түүний хамсаатнуудын тэрс үзэлтэн гэгдэж байсан Сергей Магнитский 2011 онд шоронд амиа алдсан юм.
Мөн Жон МакКейн В.Путиныг 2.5 жилийн хугацаанд үргэлжилж 100 мянга гаруй хүнийг амиа алдахад хүргэсэн Сирийн иргэний дайны жилүүдэд Ерөнхийлөгч Башар Ал Ассадын талд үйлчилсэн хэмээн шүүмжилжээ. “Путин ОХУ-ын нэр хүндийг бодоогүй. Харин харгис нөхөр Ассадтай нийлж улсынхаа нэр хүндийг унагаасан” гэсэн байна. 

Тэрээр “Ерөнхийлөгч Путин та бүхэнд итгэдэггүй. Тэр хүний эрх чөлөөт мөн чанар сул дорой байдлыг ялан дийлж шударга ёс, энх тайван, хөгжиж цэцэглэсэн нийгмийг бүтээж чадна гэдэгт итгэдэггүй. Мөн Оросууд үүнийг хийж чадна гэдэгт ч итгэдэггүй. Тиймээс тэр сул дорой байдал, авлигал, дарангуйлал, хүчирхийллээр засагладаг. Тэр та нарын төлөө бус өөрийнхөө төлөө л засагладаг” хэмээн бичжээ.

Өнгөрсөн долоо хоногт В.Путин “Нью-Йорк таймс” сонинд хэвлүүлсэн нийтлэлдээ Сирийн сөрөг хүчнийг химийн зэвсэг ашигласан хэмээн буруутгасан юм. Мөн Барак Обамагийн засаглал Сирид цэргийн интервэнц хийж занилхийлэх ёсгүй хэмээн хатуу анхааруулсан юм. Путины нийтлэл Конгрессын саналыг хойшлуулсны маргааш хэвлэгдсэн тул АНУ ОХУ-ын саналыг дэмжсэний дараа эл асуудлыг дахин сөхсөн нь Америкийн эрх баригчдын дургүйцлийг хүргэж мэдэх юм хэмээн ажиглагчид бичиж байсан билээ.