ОХУ-ын Ерөнхийлөгч Владимир Путин дөрөв дэх удаагаа ерөнхийлөгчийн сонгуульд өрсөлдөж магадгүй талаар ам нээлээ. Хэрвээ тэрээр дахин ялалт байгуулах юм бол Сталинаас хойш ОХУ-ын удирдагчаар хамгийн удаан хугацаанд ажилласан хүн болох юм.

Оросын Засгийн газрыг 13 жил удирдсан В.Путин өчигдөр мэдэгдэхдээ 2018 оны Ерөнхийлөгчийн сонгуульд өрсөлдөхийг би үгүйсгэхгүй хэмээн хэлжээ.

В.Путин Францын Ерөнхий сайд Франсуа Филлоноос Ерөнхийлөгчийн сонгуульд өрсөлдөх эсэх талаар асуухад тэрээр “Хэрвээ та энэ тухайгаа ам нээвэл би хэлнэ” гэсэн байна. Энэ ярианы дараа В.Путин олон нийтэд хандан мэдэгдэл хийсэн нь энэ аж.

60 настай Путин анх 2000 онд ерөнхийлөгчөөр сонгогдож, ОХУ-ын үндсэн хуулийн дагуу хоёр удаа дараалан сонгогдсон тул огцорсон юм. Тэрээр дөрвөн жилийн хязгаарлалтын дараа буюу 2012 онд дахин өрсөлдөж ерөнхийлөгчөөр сонгогдсон билээ.

В.Путины дотны хамтрагч Ерөнхий сайд Дмитрий Медведев үндсэн хуулинд заасан ерөнхийлөгчөөр ажиллах хугацааг зургаан жил болгон сунгасан юм. Ингэснээр хэрвээ В.Путин дөрөв дэх удаагаа сонгогдвол 2024 он хүртэл Кремлинийг удирдах юм.
Ж.Сталин 30 жилийн турш ЗХУ-г удирдсан билээ.