Хорин настай охиноо өөр кастын эрэгтэйд хайртай болж, гэрээсээ оргосных нь төлөө гэр бүлийнхэн нь зодож хөнөөсөн аймшигт хэрэг Энэтхэгийн Гханавати тосгонд гарчээ. Мөн шашны хууль зөрчсөн хэмээн найз залууг нь охины хамаатнууд нь цаазаар авсан байна.

Гэр бүлийнхэн нь хосуудыг яргалан хөнөөж буй аймшигт хэргийг тосгоны хөршүүд цугларч үзсэн бөгөөд хэн ч тэдний амийг аврахыг хүсээгүй хэмээн Цагдаагийн газраас мэдээлжээ.  Энэ хэрэгт холбогдуулан талийгаач эмэгтэйн эцэг, нагац ах болон өөр хоёр хөгшнийг баривчлан шалгаж байгаа аж. 

Хохирогч залууг 23 настай Дхармендер Барак, охиныг 20 настай Нидхи гэгч болохыг цагдаагийн газрынхан тогтоосон байна. Эрэгтэй нь Харяна мужийн Рохтакт мэдээлэл технологийн чиглэлээр сурдаг байжээ. Хосууд өнгөрсөн мягмар гарагт тосгоноос оргож, Дели хотод зугтаан ирсэн байжээ.  Тэд нэг шөнийг Энэтхэгийн нийслэлд өнгөрүүлсний дараа охины эцэг эхийн “Тар нар буруу зүйл хийгээгүй тул гэртээ ирэхээс айх хэрэггүй, хайр сэтгэлийг чинь хүлээн зөвшөөрөх болно” гэсэн ятгалганд итгэн тосгонлуугаа буцсан байна.

Хосууд хоёулаа нэг ангийн буюу Жат кастад харьяалагддаг байжээ. Жат кастын өвөг дээдсүүд цусан хамааралгүй ч гэсэн каст дотроо хайр сэтгэлээр холбогдохыг ойр төрлийнхний хурьцал буюу байж боломгүй хэрэг хэмээн үздэг байна. Тус ангийн “Khap Panchayats” зөвлөлийн хөгшид хосуудыг “Honor Killing”-ээр шийтгэхийг даалгажээ. Тэд өмнө нь Засгийн газраас “Honor Killing” үйлдэх зөвшөөрөл олгохыг шаардаж байсан байна.

Энэтхэгт “Honor Killing” буюу садар самуун эсвэл кастын системийн шашны хууль зөрчсөнөөс болж жилд 1000 гаруй эмэгтэйчүүд гэр бүлийнхэн, ар гэрийнхэндээ шийтгэгдэж хорвоог орхидог гэлээ.