Токио хотын Ханеда олон улсын нисэх буудал руу орчин үеийн Аэробус 319 маягийн жет онгоцоор Монголиан Аэрлайнес групп компани олон улсын хамгийн анхны арилжааны зорчигч тээврийн захиалгат нислэгээ өнгөрөгч баасан гаригт үйлдлээ. Энэ нь Монголын талаас зорчигч тээврийн хоёр дахь компани нислэгийн чиглэлээ нээж байгаа тохиолдол бөгөөд хоёр улсын найрсаг харилцааг хөгжүүлэх, Японоос ирэх жуулчдын тоог нэмэгдүүлэх, мөн Монголчуудаа хүссэн үедээ шууд нислэгээр Япон улсыг зорих боломжийг нээж өгч байгаагаараа туйлын ач холбогдолтой билээ.

Анхны нислэгийг үйлдэж байгаатай холбогдуулан ёслолын үйл ажиллагаа болсон бөгөөд энэхүү арга хэмжээнд тус группын захирал н.Энхтүвшин болон тус компанийн удирдлагууд, мөн А319 маягийн жет онгоцны ахлагч Мексик улсын иргэн Энрик Арлёна, онгоцны багийн бусад хамт олон, анхны зорчигчид оролцсон юм. Харин долдугаар сараас эхлэн долоо хоногт гурван удаагийн дамтамжтайгаар Ханеда руу тогтмол нисч эхлэх юм байна.