Өнгөрсөн долоо хоногт ерөнхийлөгч Ц.Элбэгдоржийн нэр хүнд сонгуулийн үеийн үзүүлэлтээс нь дутахааргүйгээр огцом өсөв. Удтал дуугуй сууж хүлээсний эцэст тэр байгаа тун чадварлаг онов. Үндсэн хуулиндаа бэлэг тэмдгийн чанартай байхаар хуульчлагдсан ерөнхийлөгч Ц.Элбэгдорж зулай дээр нь гишгэж, халуун суудлыг нь залгамжилсан экс ерөнхийлөгч Н.Энхбаярын талаар байр сууриа хатуу илэрхийлж, улс төрд наймаа байдаггүйг бодитой харуулсанаараа ийнхүү нэр хүндээ хэд дахин өсгөж чадлаа.  “Монголын ард түмэн нэг таньсан хүнээ хоёр дахин таних шаардлага байхгүй. Н.Энхбаяр хэдий ерөнхийлөгчийн эрх ямбыг эдэлж, хаан суудалд сууж байсан хүн боловч хуулийг уландаа гишгэх ёсгүй байсан. Шүүх дуудсан л бол Намбарын хүү байтугай нь зангиагаа засч гутлаа өмсөөд очих ёстой байсан” гэж монгол улсын дөрөв дэх ерөнхийлөгч Ц.Элбэгдорж хагас сарын турш улс төр, хүчний байгууллага, жирийн ард иргэдийг талцуулж, хэрэлдүүж өрнөсөн Н.Энхбаярын баривчилгааны талаарх хэлэлцүүлэгт том хар цэг тавив. Ийнхүү Ц.Элбэгдоржийн хувьд Н.Энхбаярын улс төрийн түүх хөшиг хаалаа. Н.Энхбаяртай халз өрсөлдөж, ерөнхийлөгчийн сэнтийд суусан Ц.Элбэгдоржийн бяр амтагдаж байна. АН-ыг толгойлж сөрөг хүчний үүрэг гүйцэтгэж өдий хүрсэн түүний хувьд эрх баригч хүчинг олон жил толгойлж, тэр хэрээрээ эрх мэдэл, хөрөнгө чинээгээ бэхжүүлж чадсан Н.Энхбаяр Ц.Элбэгдоржийн мөнхийн дайсан байсаар өдийг хүрсэн. Леьвовт цэргийн сургууль төгссөн үзэгнээс өөр зэвсэггүй цэргийн сэтгүүлч, орост хэлний мэргэжил эзэмшсэн орчуулагч хоёр ажил амьдралын ижил нөхцөл бүхий гараанаас зэрэг гарсан. Эсрэг тэсрэг байр суурьтай улс төрийн нам толгойлж өөр өөрийн улс төрийн түүхээ бичсэн тэд ерөнхийлөгчийн суудалд суудал хуваацан сууцгаасан хэдий ч тэдний сонирхол үргэлж зөрчилдсөөр ирсэн юм.
....... Ц.Элбэгдоржийн бяр амтагдаж байна. Ерөнхий сайдын суудлаас ч хэмжээлшгүй амбиц үнэртдэг бас мэдрэгддэг юм чинь ерөнхийлөгчийн сэнтийгээс түүнээс илүү эрх ашиг, бяр амтагдах нь мэдээж.
Ерөнхийлөгч Ц.Элбэгдорж шүүх, прокурорыг хөдөлгөж чадаж байна. Шүүх прокурор дагнасан шударга ёс тогтоох түүний Ц.Элбэгдоржийн автортой галт тэрэг гараанаас нэгэнт хөдөлсөн. Мэдээж Ц.Элбэгдоржийн дараагийн тоглолт  улстөрийн тавцанд үргэлжилнэ. Ерөнхийлөгчийн эрх мэдлийн халхавч дор АН-ыг 2012 оны ялалтанд хөтлөх тактик барьж байгаа тэрээр МАН-ын шүдний өвчин болох МАХН-аар оролдож эхлэх нь ойлгомжтой. Үнэндээ МАХН нам бол МАН-ын гэхээсээ илүү АН-ын толгойн өвчин болоод байгаа тул Ц.Элбэгдоржийн шударга ёсыг тогтоох автор бүхий галт тэрэгний дараагийн зогсоол МАХН байх бололтой. Нэгэнт МАХН-ын дарга Н.Энхбаярыг 2012 оны сонгуулийн нэр дэвшигчийн жагсаалтаас арчиж хаясанаа монгол хүн нэг бүрийг чихэнд хашгирч чадсан манай ерөнхийлөгч. Н.Энхбаярын хөлсөө урсгаж байж овооолж авсан МАХН нэрт үүрийг устгахаа ч мөн нуухгүй нь бололтой. Ц.Элбэгдорж Н.Энхбаяртай нүүж буй өргийг дараагийн нүүдэл бол МАХН-ыг татан буулгах. ....
Энэ тохироогоо ч тэр хийсэн сурагтай. УДШ бүртгэлтэй улс төрийн 19 дэх нам болж мэндэлсэн МАХН-ыг Ерөнхийлөгч Ц.Элбэгдорж улс төрийн зорилгоор байгуулагдсан авилгал, хээл хахуулиар баяжигчид, авилгалын торыг хэрсэн луйварчдын үүр уурхай гэж үзжээ. Албан ёсны удирдагчгүй, гишүүнчлэл, дэмжлэг гээд байхаар юмгүй МАХН Ц.Элбэгдоржийг гараар орж нүд анихад хэдэн хоног үлдээд байна. Н.Энхбаяр яллагдагчаар татагдаж, албан ёсны удирдлагаа алдаад байгаа МАХН-ны санхүүжилт ч тасалдаж, цаашид үйл ажиллагаа явуулж, улс төри йн сонгуульд орох боломж муутай эмнэлгийн хэллэгээр бол “сэхээн амьдруулах”-д ухаангүй шахам байх энэ үед нь ерөнхийлөгч Ц.Элбэгдорж нухчин дарахаар бэлтгэж байна. Барын зулзгыг бага дээр нь гэдэг хойно доо. Ерөнхийлөгчийн ч зөв биз. Үргэлж өмнөх тавагтай хоолыг нь булаалдаж явсан улс төрийн дайснаа нэг мөр дарж авах гэх нь Ц.Элбэгдорж зөв. Тиймээс улс төрийн намуудын дунд нэр дэвшигчээ тодруулах , ээлжит Бага хурлуудаа хийх зэрэг амьсгаа өндөр байх шинэ долоо хоногт Ц.Элбэгдоржийн зүгээс МАХН-ыг татан буулгах ажил өрнүүлэх бололтой. Болсон болоогүй улс төрийн намуудыг татан буулгана. Улс төрийн намуудын халаасанд орсон хууль хүчний болон төрийн байгууллагуудыг чөлөөлөх болно гэсэн мэдэгдлийг гүйцэтгэл Н.Энхбаярын нэр дээр МАХН-аас эхлэнэ.
Өнөөдөр УИХ-ын сонгууль. Маргааш ерөнхийлөгчийн сонгууль. С.Баярыг гол өрсөлдөгчөө гэж тооцохгүй байгаа Ц.Элбэгдорж МАН-аас дэвших магадлалтай хүмүүсийн нэг М.Энхболдоос илүү Н.Энхбаяраас жийрхэж, чадалгүй явахад нь нэг мөр дарж авах гэсэн сонирхол юунд байна вэ?...
УИХ-ын гишүүн Э.Бат-Үүлын эцэг Ардын уран зохиолч С.Эрдэнэ агсны амьд ахуйдаа захиж үлдээсэн их холын шуналтай нэг л бөхийсөн дээр нь дарж авахгүй бол ирээдүйд хэнд ч юунд ч үл дийлэх хүчирхэг нэгэн болж дахин амилах Н.Энхбаяр эрх баригч хүчнээс гарсан ч нам, төр засагтаа гомдогчдыг тал тохой татаж өөртөө элсүүлэн арван өөр төрлийн төрхтэйгээр улс төрд дахин амилсан нь Ц.Элбэгдорж Ерөнхийлөгчийг айлгасан хэрэг. Угшил нэгтэй эрх баригч хүчиндээ ч дийлэхгүй янзтай Н.Энхбаярыг Элбэгдорж АТГ-ын хүчээр л авдартаа хийж авав. Эзнийг нь дөнгөлж чадсан түүнд үүрийг нь устгах юухэн байхав. Ингэж чадвал 2013 он Ц.Элбэгдоржийн халаасанд орж байгаа нь тэр. Нэг цагт ерөнхийлөгчийн суудалд заларч, шүүх, цагдаа ,АТГ зэргийг хуруу дохих төдийд удирдаж явсан Н.Энхбаяр өөрөө амьд архив. Н.Энхбаяр гэх тэр хар дэвтэрт Ц.Элбэгдоржийн гэх материал хэдэн авдар бий гэдэгтээ мөрийцөхөд ч бэлэн байна. Өрөө төлж чадахгүй бол өрийн бичгийг ямар нэг аргаар устгах л хэрэгтэй. Ямар ч хамаагүй аргаар шүү дээ.......