УИХ-ын гишүүн, Сангийн сайд Д.Хаянхярвааг онцоллоо. Тэрбээр 2008 оны УИХ-ын сонгуульд Дархан-Уул аймгийн 19 дүгээр тойргоос УИХ-д сонгогдон ажиллаж байгаа билээ. Зочин маань1960 онд Завхан аймгийн Их-Уул суманд төрсөн. 1970-1978 онд Завхан аймгийн Их-Уул сумын найман жилийн дунд сургууль, 1978-1980 онд Завхан аймгийн Тосонцэнгэлийн 10 жилийн дунд сургуулийг дүүргэсэн байна. Д.Хаянхярваа сайд МУИС –ийг 1980-1981 онд, 1986 онд Москвагийн Удирдлагын дээд сургуулийг удирдлагын зохион байгуулалт, барилгын инженер эдийн засагч мэргэжлээр төгсжээ. 1999 онд Монгол Улсын Техникийн их сургуулийг санхүү, менежмент мэргэжлээр суралцсан бизнес удирдлагын ухааны магистр зэрэгтэй. 2005 онд Монгол Улсын Засгийн газрын хэрэгжүүлэгч агентлаг Удирдлагын академийн «Төрийн захиргааны шинэчлэл ба Засгийн газрын үйл ажиллагааны хөтөлбөр» сэдэвт сургалтад хамрагдсан юм.
Завхан нутгийн унаган хүү Д.Хаянхярваа Дархан хоттой ажил амьдралаа холбож, нутгийн засаг захиргаанд 20 гаруй жил ажилласан юм. 2000-2008 онд Дархан-Уул аймгийн Засаг даргаар ажиллаж байсан. Дархан-Уул аймгийн хөгжил, дэвшил, шинэ бүтээн байгуулалтууд Д.Хаянхярваа сайдын хичээл зүтгэлтэй нягт холбоотой. Дархан нутгийн ард түмэн сайдыг оновчтой шийдвэр гаргадаг, хэрэгжүүлдэг, ажлыг өндөр түвшинд зохион байгуулдаг, удирдах өндөр ур чадвартай хүн хэмээн үнэлдэг.
Сангийн сайд Д.Хаянхярваа төрийн бодлого оновчгүй байх нь улс орны хөгжилд саад, тотгор болдог хэмээн үздэг. Тийм дээ ч аль болох төрийн бодлогыг оновчтой шударга байлгахын төлөө тууштай тэмцэж, хэд хэдэн чухал ач холбогдолтой хуулийг санаачилж, УИХ-аар батлуулсаар ирсэн. Эдгээр хууль нь ард иргэдийн амьдралд тустай хууль болсон гэж мэргэжилтнүүд үздэг.
Дархан-Уул аймгийн ард түмний дуу хоолой болохоор УИХ-д сонгогдсоны хувьд дэлхий нийтийн жишгийг харгалзан, орчин үеийн үйлдвэрлэл, дэд бүтэц бүхий төвүүдтэй болгохын төлөө ажиллаж байна. Дархан-Уул аймгийг хэдэн жилийн дараа Улаанбаатартай адил асуудалтай болгохгүйн тулд хөдөө орон нутаг руу чиглэсэн хөгжлийн бодлогыг тодорхойлохын төлөө тууштай зүтгэдэг нэгэн.
Түүний хийж бүтээсэн ажил, хичээл зүтгэл нь улсын хөгжил дэвшил, бүтээн байгуулалтад чухал нөлөө үзүүлсэн гэдэгтэй маргахгүй биз. Сангийн сайд Д.Хаянхярваагийн хичээл зүтгэлийг төр засгаас өндрөөр үнэлж, Ардын хувьсгалын 80 жилийн ойн медаль, Монгол Улсын Засгийн газрын шагнал болох Хүндэт өргөмжлөл хүртээсэн юм. Эдийн засгийн тэргүүний ажилтан, Үйлдвэр худалдааны тэргүүний ажилтан цол тэмдгээр шагнагджээ. Их Монгол Улс байгуулагдсаны 800 жилийн ойн медаль, Алтан гадас одон. МАХН-ыг Хүндэт тэмдэг, МАХН-ын «Ард түмний төлөөх» өргөмжлөлөөр шагнуулаад байна.
