МАН-ын гишүүн Ч.Улаан, Д.Тэрбишдагва, О.Чулуунбат, Ц.Даваасүрэн нар намынхаа бүлгийн үйл ажиллагаанд оролцохгүй гэдгээ мэдэгдэж албан ёсны өргөдлөө МАН-ын бүлгийн дарга Ө.Энхтүвшинд өгсөн талаар хэвлэлээр мэдээлсэн. Гэвч өчигдөр МАН-ын бүлгийн дарга Ө.Энхтүвшин ажил дээрээ байгаагүй тул тэд өргөдлөө албан ёсоор өгч чадаагүй байна.

   Эдгээр гишүүд МАН-аас гарч, МАХН-д элсэхээ удаа дараа үгүйсгэж байсан ч өчигдөр албан ёсоор мэдэгдсэн гэж эх сурвалж хэлж байна. Өчигдөр орой тэд МАХН-ын бага чуулган дээр очоогүй ч хурлын дараа УИХ-ын гишүүн Ч.Улаан, Д.Тэрбишдагва нар МАХН-ын ерөнхий нарийн бичгийн дарга Н.Удвалтай уулзжээ. Өмнө нь МАН, МАХН-ын гишүүд нэг харьяалалтай байсан тул тэд МАХН-д шинээр элсэхгүй, харин хуучин гишүүнчлэлээ дахин сэргээхээр болсон аж. Энэ тухайгаа өнөөдөр 14 цагт төрийн ордонд хэвлэлийн бага хурал зарлаж, албан ёсоор мэдэгдэх юм байна.
 
   Бүлгийн ажилд оролцохгүй гэж одоогоор гарын үсэг зураагүй байгаа ч УИХ-ын гишүүн Д.Загджав тэдэнтэй нэгдэнэ гэж зарим эх сурвалж хэлж байна.