Хөвсгөл аймгийн Ханх сум буюу нуурын хойд эрэг, Мөнх сарьдаг уулын Оросын талд 3000 орчим хүн цуглаад байна. Тэд хээрийн хувцас өмсч, уулын хэрэгсэл агсаж, үүргэвч үүрчээ. Тавдугаар сарын эхний долоо хоногт туршлагатай 30 уулчнаар удирдуулсан сонирхогчид Саяны нурууны өндөр цэг болох Мөнх сарьдагт авиралт хийхээр ирсэн нь энэ.   

   Уулын спортын хичээл, дадлага, авиралт, аяллын дууны наадам зэрэг олон арга хэмжээг Эрхүү мужийн уулын спортын холбооныхон төлөвлөсөн байна. Энэ наадмын хамгийн залуу оролцогч-авирагч 16 настай.
   Мөнх сарьдаг нь далайн төвшнөөс 3491 метр өндөр бөгөөд Монгол, Орос улсын хил ноён оргилоор нь дайрдаг юм. Энэ уулаас холгүй Монголын талаас Ханх, Оросын талаас Монд хэмээх хилийн боомт бий.