МАН-ын дөрвөн гишүүн намаасаа гарах гэж байгаа тухай олон хоног яригдсан яриа өнөөдөр бага ч гэсэн тайлагдаж байна. УИХ-ын гишүүн Ч.Улаан, Д.Тэрбишдагва, О.Чулуунбат, Ц.Даваасүрэн нарын гишүүд МАН-ын бүлгээс албан ёсоор гарч байгаагаа мэдэглээ. Гэхдээ тэдний зарим нь буюу УИХ-ын гишүүн Ч.Улаан, Д.Тэрбишдагва нар хуучин МАХН-ын гишүүнчлэлээ сэргээнэ гэж байгаа бол нөгөө хоёр нь хараахан шийдээгүй байгаа аж.Ч.Улаан: “Хууль зүй, дотоод хэргийн сайд Ц.Нямдоржийг огцруулах ёстой гэсэн хатуу байр сууриндаа бат зогсож байгаа. Гэсэн ч МАН-ын бүлгийн бусад гишүүдтэй зөвшилцөж чадаагүй. Тиймээс цаашдаа ч гэсэн олонхийн саналыг дагаад явах боломжгүй болсон тул МАН-ын УИХ дахь бүлгээс гарч байгаагаа албан ёсоор мэдэгдэж байна” .
Ц.Даваасүрэн: “Зөвхөн Ц.Нямдорж сайдын асуудлаар ч биш, иргэн бүр сая төгрөг өгнө гэсэн сонгуулийн амлалтаа биелэх боломжгүй байгаа талаар бид олон удаа асуудал тавьсан. Гэтэл УИХ-н гишүүний хувьд намаасаа улс төрийн дэмжлэг авч чадахгүй байгаа. Гэхдээ энэ нь намаас гарлаа гэсэн үг биш, намын нэг бүтцээс гарч байгаа хэрэг” гэв.
Д.Тэрбишдагва: Анх найман гишүүн Ц.Нямдорж сайдын асуудлыг хөндсөн. Улс төрч хүнд хамгийн чухал нь ёс зүй байдаг. Гэтэл үүнийг нь олонхоороо хамгаалж, хаацайлсан. Намаас гарсан ч, гараагүй ч хариуцлага ч хүлээнэ гэдгийг бид урьдчилан харсан учир ийм шийдэлд хүрлээ.
О.Чулуунбат : Монголчууд олон зуун жил бие биенээ хүндэлж, хайрлаж ирсэн. Төр засаг нь өөрөө энэ бичигдээгүй хуулийг зөрчөөд байгаа учраас ийм шийдвэр гаргахад хүрлээ. Энэ бол улс төрийн гэхээс илүү ёс суртахууны сонголт.
Эдгээр гишүүд Ц.Нямдорж сайдыг огцруулахаас гадна сонгуулийн амлалт, ашигт малтмалын лицензийн асуудлыг олон удаа сөхөж тавьсан ч МАН-ын бүлэг нь хүлээж аваагүй аж. Нэгэнт улс төрийн дэмжлэг байхгүй байгаа тул бие дааж нэр дэвшсэн ч болох тухай Ц.Даваасүрэн гишүүн үг унагаж байлаа.Түүнийг тойрог олдохгүй, рейтинг нь муу байгаа тул ийм үйлдэл хийж байна гэх яриа гараад байгаа юм. Ц.Даваасүрэн гишүүн үүнийг эрс үгүйсгэж "Намын бүлгээс гарах шийдвэртэй тойргийн асуудал огт хамаагүй. Миний энэ шийдвэрийг олон нийт хэрхэн хүлээж авахаас дараагийн алхам хамаарна" гэлээ. Харин Д.Тэрбишдагва гишүүн "Намайг гарах тухай сонссон хүмүүс та анхны намаа сэргээх гэж байна уу гээд өчигдөр утас улайстал ярьсан" гэж байв.
