2006 онд Малайз улсад манай улсын иргэн Ш.Алтантуяа бусдын гарт хэрцгийгээр алагдсан хэрэг гарсан билээ. Уг хүн амины хэрэгт Малайз улсын ерөнхий сайдын зөвлөх, улс төр судлаач Абдул Разак Багиндаг захиалгат аллага үйлдлүүлсэн гэж буруутгасан юм.

    Энэ хэргийг гардан гүйцэтгэсэн гэж тус улсын ахлах байцаагч Азилах Хадри, цагдаагийн офицер Сирүл Азхар Умар нарыг буруутнаар татсан юм. 39 настай Сирул Азхар Умар, 34 настай ахлах байцаагч Азила Хадри нарыг 2009 онд тус улсын Шах Аламын дээд шүүхээс Монголын иргэн Ш.Алтантуяагийн амийг хөнөөсөн гэж шийдвэр гаргаж, ял оноосон юм.

    Тэгвэл сүүлийн үеийн буюу өчигдрийн мэдээгээр цагдаагийн офицер Сирул Азхар Умарыг давж заалдах шатны шүүхэд хандахыг зөвшөөрлөө гэж Малайз улсын үндэсний мэдээллийн агентлагаас мэдээллээ. Давж заалдах шатны шүүх хурал хуваарийн дагуу энэ оны наймдугаар сарын 27-28-ны өдрүүдэд болно.

2004 онд манай улсын иргэн Ш.Алтантуяа Малайз улсад хөл тавьж, хүн амины хэргийн цаад эзэн гэгддэг Р.Багиндатай танилцсан байна. Ш.Алтантуяа түүний орчуулагчаар Франц улс руу явж, улмаар амрагийн холбоотой болсон гэдгээ Малайз улсын улс төр судлаач Б.Багинда хүлээн зөвшөөрсөн юм. Тухайн үед Р.Багиндад холбогдох ноцтой хэргийг Ш.Алтантуяа мэдсэний улмаас алагдсан гэж үздэг.

 Энэхүү хүн амины хэрэг шийтгэдэлгүй 3 жил болсны эцэст 2009 онд шүүх Р.Багиндаг буруугүй гэж үзэн, ямар ч шийтгэл ногдуулаагүй. Одоо хүртэл үнэн учир нь олдоогүй байж магадгүй энэ хэргийн хамсаатан болох цагдаагийн офицер С.А.Умарыг давж заалдахыг зөвшөөрсөн нь ээлжит “худал” цагаатгал болох гэж байж магадгүй. Харин хэргийн гол эзэн Р.Багинда одоогоор Малайзын нэгэн нууцлаг компанийн дуулианд холбогдоод байна.