МАН-ын дөрөвдүгээр бага хурлаар тус намын мөрийн хөтөлбөрийг хэлэлцэж байгаа. Үүний хажуугаар МАН-ын УИХ дахь дөрвөн гишүүн тус намаас гарах болсноо мэдэгдсэн. Энэ тухай МАН-ын дарга, ерөнхий сайд С.Батболд байр сууриа илэрхийллээ. Тэрбээр “МАН бол маш их өргөн түүхтэй, мөн туршлагатай, уламжлалтай, шинэчлэгдэж чаддаг улс төрийн хүчин. Түүний нэг илэрхийлэл бол МАН өөрийн уугуул нэрээ сэргээсэн явдал. МАН бол МАХН-ын эхлэл бөгөөд үргэлжлэл юм. Өнгөрсөн хагас жил гаруйн хугацаанд МАН-д 60 гаруй мянган гаруй гишүүн орсон. Дунджаар өдөрт 500 гаруй гишүүн манай намын эгнээнд орж байгаа. Харин гарч байгаа гишүүдийн тоо бол туйлын бага 276 хүн байна. Түүний дотор зарим УИХ-ын гишүүн гарсан гэсэн мэдээлэл бидэнд байгаа” гэв. “Дөрвөн гишүүн гарч байгаа, мянга мянган гишүүн элсэж байгаа нь манай намын дотоод ардчиллыг илэрхийлж байна. Мянга мянган гишүүн элсэж, цөөн хэд нь гарч байгаа нь манай нам төдий хэмжээний өргөн ардчилалтай, дотоод өөрчлөлт шинэчлэлтийг тууштай явуулж чаддагийг харууллаа. МАН эхлүүлсэн хөгжлийн бодлого үргэлжлүүлнэ. Хамтарсан Засгийн газраас АН гарахад бид өмнөө тавьсан зорилтыг хүний өөрийн гэж ялгахгүйгээр хийгээд явж байна. Замын дундаас ханилж яваад гарч байгаа улс төрийн хүчин байна уу, зарим нэг хувь гишүүд байна уу, үүнд бол ямар нэг ач холбогдол өгөхгүй. Бидний ярьдагаар МАН байж байсан, цаашдаа ч байх болно. Жингийн цуваа явж л байг” гэж намын даргын хувь байр сууриа илэрхийлэв.
