Ч.Улаан гишүүн өөрийг нь өдий зэрэгт хүргэсэн нам руугаа нулимж, нөхөддөө баяртай гэж хэлээд явахдаа огтхон ч эмзэглэсэнгүй. Харин ч МАН-ынхаа нөхдөд том “сюрприз” барилаа. МАН-ын нөхөд нь бага хурлаа хийж, мөрийн хөтөлбөрөө хэлэлцэж, тулгамдсан асуудлаа ярилцаж байх өдрийг сонгон байж МАХН-д элслээ. Өдрийн сайныг өнжин хүлээлээ гэдэг шиг МАН-ынханд хүнд цохилт болох үйл явдлыг хүлээж байсан бололтой. Жилд хааяа нэг болдог Бага хурлаар сонгуулийн мөрийн хөтөлбөрөө хэлэлцэх өдөр нь тэд өөр сонголт хийж, нөхдөө “баярлуулав”. Зүгээр ч нэг гарсангүй. МАХН-д гүйж очоод мөнгөн аягтай ааруул аваад учиргүй их баярлаж байгаа зурагууд нь сайтуудаар гарав. Инээд хүрэм энэ агшныг нь харсан хүмүүс “Улаан цагаан идээндээ хахах вий дээ” гэж шоолох аж. МАН-ын намын гишүүдийн дэмжлэгээр, энэ намын буянаар байж болох бүхий л өндөр албан тушаалд томилогдсон Ч.Улаан гишүүн урвалт гэж юу байдгийг тавь хол гарсан насандаа харууллаа. Уг нь тэрээр хархан үстэй хонгорхон зүстэй байхдаа МАН-д элсэж зааварлагч, тасгийн эрхлэгчээс ажлын гараагаа эхэлж, ерөнхий нарийн бичгийн даргын зөвлөх хэмээх хариуцлагтай ажил хийж явжээ. Харин МАН-ын нэрээр 1996 оноос хойш тасралтгүй дөрвөн удаа УИХ-ын гишүүнээр сонгогдож, Сангийн сайдаар хоёр удаа, Үндэсний хөгжлийн газрын дарга буюу Засгийн газрын гишүүн, Шадар сайдаар томилогдож байсан. Өөрөөр хэлбэл Засгийн газрын гишүүнээр бас л дөрвөн удаа томилогджээ. Ингэж МАН-ын нэрээр бүхий л өндөр албан тушаалд томилогдсон хүмүүсийн нэг. Бас энэ намын дэмжлэгээр Гавъяат эдийн засагч болохоо ч мартаагүй юм. Харин одоо намаа, нөхдөө ашиглаад дууссан бололтой.
Түүний урвалт, сэтгэл хөрөлт үүгээр дуусахгүй. Үүнээс өмнө эхнэрээ сольж залуухан хатагтайгаар гоёх болсон юм. Ийнхүү Ч.Улаан гишүүн хамгийн эрхэм хоёр үнэт зүйлсээ солилоо. Харин түүний гуравдахь урвалт нь сүхбаатарчууд байх бололтой. Учир нь тэрээр энэ удаа Сүхбаатар аймагтаа нэр дэвшихгүй Улаанбаатарт өрсөлдөнө гэж мэдэгджээ. Ийнхүү Ч.Улаан сайд улайхгүй урвалт хийгээд л явна.
Тэрээр “Би зарчим баримталдаг. Энэ зарчмын байр суурин дээрээ байна” гэж мэдэгдсэн. Нэг л их зарчим ярьсан хүн. Түүний зарчим тэгээд урвалт уу?
Харин түүнийг урвалтаа хийж, мөнгөн аягатай ааруулаар угтуулж баярлаж байх агшинд намынх нь удирдлага Ч.Улаан тэргүүтний талаар байр сууриа илэрхийлэв. Мэдээж намынхаа гишүүнээс хүсэлтийнх нь дагуу чөлөөлсөн.
МАН-ын дарга С.Батболд “Би тэдэнтэй арав гаруй удаа уулзсан. Уурлаж, учирлаж зөндөө хэлсэн. Өөрийнхөө шийдвэрийг зөв гэж үзэж байгаа юм билээ. Өнөөдрийг хүртэл энэ хүн намынхаа талаар элдэв яриа өгөөд л явсан. Харин манай намын удирдлагууд гишүүдээс хэн нь ч түүнийг муулаагүй. Харин одоо хариуг нь барих ёстой. Манай намаас явсан хүмүүс амжилтанд хүрч байгаагүй” гэсэн утгатай үг хэлжээ. Харин МАН-ын ерөнхий нарийн бичгийн дарга У.Хүрэлсүх “Далай тэнгис муу зүйлээ давалгаагаараа гаргаж эрэг дээрээ хаяж байдаг. Түүнтэй адил үйл явдал болж байна. Бид авлигыг хамгаалахгүй, авлигатай тэмцэнэ. Шударга ёс тогтоохын төлөө явж байгаа энэ үед зарим хүмүүс намаас гарах нь ердийн үзэгдэл” гэжээ. У.Хүрэлсүхийн үгэнд нэг онцгой зүйл байгааг анзаарч байгаа биз дээ. “Бид авлигыг хамгаалахгүй, авлигатай тэмцэнэ гэж”. Энэ хэнд хаяглагдсан юун тухай болохыг дараа дараагийн үйл явдал харуулж мэдэх юм.
24tsag.mn
