Сонгуулийн зүг дуу хадаан айсуй жингийн цуваанаас үеийн үед хэн нэгэн гээгдсээр ирсэн. “Цаг үеийн нөхцөл байдлаас” гэсэн ерөнхий шалтгаанаар намаасаа гарагсад үеийн үед байсаар байна. Энэ нь ч шинэчлэлийн нэг хэлбэр гэдэгтэй маргах зүйлгүй. Гэлээ ч намаасаа гараад бие даасан ч бай, өөр намд толгой хорогдсон ч бай хуучин намдаа байснаасаа илүү амжилт олсон жишээ Монголын улс төрд цөөн. Янз бүрийн шалтгаанаар намаасаа гарч байдаг ч ихэнхи нь эрх мэдлийн бялуунаас хуваалцаж чадахгүй болохдоо өөр зам сонгодог нь нууц биш. 24 цагийн өмнө ч гэсэн энэ жишээгээр МАН-ын гурван гишүүн угсаа гарал нэгтэй ч уг үндсээрээ зөрчилдөх болсон МАХН-д очиж, цэнхэр хадаг авлаа. МАН-ын ёс зүйгүй байдлыг тэвчишгүй гэж өөр сонголт хийсэн тэднийг буруутгах аргагүй. Харин сонгууль дөхсөн энэ үед тэдэнд ямар хожил байна вэ гэдэг чухал асуудал аж. Өмнө нь намаасаа олон хүн гарч байсан. МАН-аас тэр, АН-аас тэр. МАН-аас гарсан Ж.Гомбожав, Б.Лхагвасүрэн нар намдаа эргээд ирсэн. Харин АН-аас гарсан М.Энхсайхан, М.Сонинпил, Н.Батцэрэг нар өнөөг хүртэл энэ намд байснаасаа илүү мэдэлтэй болж чадсангүй. Тэднийг АН-аас гарахад Ц.Элбэгдорж “Том модноос тасарсан навч ургадаггүй” гэж байсан. Тэгвэл өгчигдөр МАН-ын дарга С.Батболд намаасаа гарсан гишүүддээ “Улс төрийн хүчин байна уу, хувь гишүүн байна уу, үүнд тийм ч их ач холбогдол өгөхгүй. Жингийн цуваа явж л байдаг” гэж буйр зааж хэлсэн. Энэ нь цаанаа МАН-д тэдний орон зайг нөхөөд гараад ирэх боловсон хүчин байгаа гэдгийг хэлээд байна.
Д.Тэрбишдагва, Ч.Улаан, О.Чулуунбат нарын хувьд сонгуулийн өмнөх жилийн онцлогоор МАН-д бас ч гэж эрх мэдлийн сэжүүрээс атгаад авлаа. Гэлээ ч МАХН-ын жинхэнэ “эзэн” Н.Энхбаяр гарч суллагдаж, сэнтийдээ заларсан тохиолдолд тэдний байр суурь одоогийнх шигээ өндөрт өргөгдөхгүй гэж олон хүн үзэж байна. Намын дэд дарга байлаа гээд тэрнээс цааш ахих нүүдэлгүй болно гэсэн үг юм.
Өчигдөр эдгээр гишүүдийн дунд ёс суртахуун ба эр зоригийн тухай яриа хөөрөө өрнөж байв. УИХ-д суудал авсан, олон жил нэг хэсэг нь байсан намаасаа гарсан нь тэднийг “эр зоригтон” гэхийн хажуугаар “урвагч” гэх нэр олгов. Хоёр дахь нэрээс үнэндээ хүн бүр эмээдэг. Тиймдээ ч Ц.Нямдорж сайдыг огцруулна гэж байсан найман хүний дөрөв нь замаас буцав. Нам нь тойрог амласан байх, муу нэртэй ч болохыг хүсээгүй байх. Р.Раш, Д.Загджав, Д.Балдан-Очир нар сонгуулд нэр дэвших тойрогтоо болоод нэрээ татсан гэх нь байна. Харин УИХ-ын гишүүн Ц.Даваасүрэн намаасаа гарсан ч одоогоор МАХН-д очоогүй байна. Аль нь ашигтай вэ гэдгийг тунгаах эгзэгтэй цаг тул хүлээхээр шийдсэн бололтой.
Айсуй нүүдэлж буй асар том жингийн цуваанаас ганц нэгээрээ хүмүүс гээгдсээр. Гэсэн ч жингийн цуваа явсаар л байна.
