Энэхүү арга хэмжээнд тус хоёр намын гишүүд, дэмжигчид нийлсэн 200 орчим хүн цугларсан байсан. МАХН-ын шинэхэн дэд дарга Д.Тэрбишдагва, нарийн бичгийн дарга О.Чулуунбат, Ч.Улаан, Н.Удвал тэргүүтэй гишүүд "Бид шударга ёсыг авчирна" гэсэн уриан дор хамтдаа нэгдэж байгаа илэрхийлсэн юм. “Шударга ёс тогтоох эвсэл”-д МАХН, МҮАН-аас тус бүр 8, 8 гишүүд багтаж байгааг хүндэтгэлийн зоогийн эхэнд танилцуулсан. Тэд гахайн махтай зоог барьж, хундага дарс ууцгаасан юм.

    Хуучин болон шинэ МАХН-уудаа үнэнч үе, үеийн гишүүд, дэмжигчид нь их л сэтгэл хангалуун байгаа харагдсан. Содон, сонирхолтой харагдаж байсан хүмүүсээр ерөнхийлөгч асан, МАХН-ын дарга Н.Энхбаярын ууган хүү  Э.Батшугар, “Амлалт нэхэх ард түмний хөдөлгөөн”-ий тэргүүн Г.Уянга, ардын жүжигчин Ж.Гантөмөр, дуучин Н.Гантулга, өмгөөлөгч О.Баасанхүү нарыг нэрлэж болно. Харин нь МҮАН-ын дарга М.Энхсайхан, МАХН-ын даргын гэргий О.Цолмон нар ирсэнгүй.
    МАХН болон МҮАН хамтран байгуулсан эвсэлд 2012 оны УИХ-ын сонгуульд нэр дэвших, ялах найдлага тавьж буй гишүүдээс бүрдсэн нь харагдсан юм.
   МАХН-ын шинэхэн дэд дарга Д.Тэрбишдагва, нарийн бичгийн дарга О.Чулуунбат, Ч.Улаан  нараас МАН-аас гарах шийдвэрийг нэгэнт гаргав уу хэмээн асуухад ийм шийдвэрийг гэнэт гаргадаггүй. Бүх зүйл эртнээс төлөвлөгдсний дагуу явж байна. Энэ оны сонгуульд нэр дэвших эсэхийг цаг үеийн нөхцөл байдлыг харж байж шийднэ гэсэн юм.

    МАХН-ын нарийн бичгийн дарга Н.Удвал энэхүү арга хэмжээг ерөнхийд нь удирдаж, хоёр намын гишүүд хоорондын холбогч гүүр мэт харагдаж байв. Н.Удвалаас Шударга ёс тогтоох эвсэл”-ийн гишүүд нь танай хоёр намаас УИХ-ын сонгуульд нэр дэвшигчид гэж давхар ойлгож болох уу гэсэн асуултад нэр дэвших нь байгаа, нэр дэвшихгүй нь байгаа гэж хариулсан юм.

    МАХН-МҮАН хамтарсан байгуулсан эвслээс сонгуулийн мөрийн хөтөлбөр тодорхой болсон бөгөөд Таван шударга гэсэн ерөнхий зарчимтайгаар 2012-2016 онд шударга ёсыг тогтоон ажиллах болно гэдгээ мэдэгдлээ.

    Улс төрийн амьдрал өрнүүн байна. Энэ нь УИХ-ын сонгуультай шууд холбоотой. Ирэх цагийн сонгууль бүр өмнөх сонгуулиасаа илүү хөдөлгөөнтэй, дуулиантай болж байх нь тодорхой боллоо. 2012 оны УИХ-ын сонгуулийг угтсан, тохиолдуулсан үйл явдлууд, сонгуулийн өдрүүдэд гоё, гоё юм ч болох нээ. Гоё гэдгийг хашалтанд хийсэн нь дээр болов уу. “Гоё” сонгууль болно.