УИХ-ын гишүүн Ц.Даваасүрэн өчигдөр МАН-ын бүлгээс гарч байгаагаа албан ёсоор мэдэгдсэн. Харин МАН-аас гарах тухайгаа олон нийтийн үзэл, хандлагыг харж байж шийднэ гэж байсан юм. Гэвч түүнийг МАН-ын дөрөвдүгээр бага хурлын шийдвэрээр намын Бага хурлын гишүүнээс хассан. Тэрбээр өөрөө гарах шийдвэр гаргаагүй байхад хассанд бухимдаж байгаагаа хэлсэн юм. Ц.Даваасүрэн гишүүн "Энд намын удирдлагууд яаж хандаж байгаагаас биш, намын нөхдөөсөө асууж байж энэ асуудлыг шийднэ гэсэн байтал бүлгээс гарсан гэдгийг  намаасаа гарлаа гэж ойлгодог юм уу.  Эсвэл намайг өөр намд орсон гэдэг ойлголттой байсан уу, Бага хурлын гишүүнээс хассан нь ёс зүйн хувьд буруу алхам. УИХ-ын гишүүнийг улстөрийн нам шийтгэх ёсгүй. Намайг Бага хурлын гишүүнээс чөлөөлсөн нь олон мянган сонгогчид руу бас тааламжгүй алхмыг намаас хийж байна гэж ойлгож болно” гэлээ. Ц.Даваасүрэн гишүүн МАХН нэрээ өөрчилж, хоёр хуваагдсан цагаас хойш намын дотоод хагарлыг хурцатгахгүй гэж бодож ирсэн ч тул намаасаа гарахыг яараагүй гэж байлаа.
   Өчигдөр МАН-ын бага хуралд ирээгүй шалтгаанаа Ц.Нямдорж сайдыг огцруулах асуудал дээр намын гишүүдтэйгээ санал нийлэхгүй байсан тул очоогүй гэж тайлбарласан юм. 
    Тэрбээр "Бага хурал нь УИХ-д нэр дэвшигчдийг сонгодог. Тэгэхээр намайг УИХ-ын сонгуульд нэр дэвшүүлэхгүй гэсэн явуулга гэж ойлгож байна. Намын дүрмээр тухайн намдаа суудал авчирсан, Засгийн эрхийг авахад хувь нэмрээ оруулсан гишүүн Бага хурлын гишүүн байх эрхтэй. Өчигдөр Хяналтын хорооны дарга Дондог надтай утсаар ярьсан. Би “Нямдоржийн асуудалд хатуу байр суурьтай байгаа. Өнөөдөртөө би намаас гараагүй” гэж хэлсэн ч үүний дараа намайг хасах шийдвэр гаргасан юм билээ" гэв.