Хоёр жилийн өмнө Дархан-Уул аймагт төмөр замын гарам дээр осолд орсон Э.Энхмөнх хүүг БНСУ-руу явуулж, яаралтай эмчилгээ хийх хэрэгтэй болжээ. Тиймээс хүүгийн гэр бүлийнхэн олон нийтэд хандан туслахыг хүсч байна.

    2010 оны 5-р сарын 21 өдөр 15 настай Энхтөрийн Мөнхтэнгэр хүү нь хоёр  настай дүүгээ тэврэн вакциныг нь хийлгэхээр өрхийн эмнэлэг рүү явж байгаад гэрийнхээ урд байдаг төмөр замын гарам дээр осолд оржээ. Э.Мөнхтэнгэр хүү газар дээрээ нас барж 2 настай дүү Э.Энхмөнх хүүгийн баруун гар нь тасарч насаараа эрэмдэг зэрэмдэг болсон юм. Дархан-Уул аймгийн "Дархан-1" өртөөний дөрөвдүгээр замд уг хэрэг гарсан бөгөөд тэр өдөр дохиочин нь Улаанбаатар хот руу тэмцээнд явсан, вагон найруулагч нь зогсох дохио өгөлгүй Галт тэрэгний хөдөлгөөний журмын 10.31 дэх заалтыг зөрчиж бусдын биед хүнд зэргийн гэмтэл учруулсан, бусдын амь насыг хохироосон гэм буруутай болох нь тогтоогдсон аж. Одоо Э.Энхмөнх хүү 4 нас хүрсэн бөгөөд гар нь ургаж БНСУ руу эмчилгээнд яаралтай явах зайлшгүй шаардлагатай байгаа юм.

   Тиймээс хүүгийн аав Энхтөр "Монголын төмөр зам" компаниас эмчилгээний зардал нэхэмжилсэн боловч манай талаас буруу байхгүй гэсэн байна. Монгол улсын дээд шүүхийн тогтоолоор "Монголын төмөр зам" компани буруутай болохыг тогтоож, 506-дугаар зүйлийн 506.1-д зааснаар хохирогч Э.Энхмөнх хүүд тус компани нь эмчилгээний болон хиймэл эрхтэн хийлгэх зардлыг гаргаж өгөх үүрэгтэй гэж шийдвэрлсэн байна. Гэсэн ч тэдэнд хууль үйлчилдэггүй бололтой.

   Энэ эмгэнэлт, аймшигт хэргийн улмаас хоёр хүүгийн ээж Энхжаргал нь сэтгэл санааны гүн хямралд орж, оюун санааны сааталд орсон байна. Хэрвээ "Монголын төмөр зам" компани ажилдаа хариуцлагатай хандсан бол өнөөдөр энэ айлын амьдрал орвонгоороо өөрчлөгдөж ийм гай зовлон нүүрлэхгүй л байх байсан болов уу. Хоёр настай дүүгээ халуун амиараа аварч өөрөө вагоны доогуур орон бусыг нас барсан Э.Мөнхтэнгэр хүүгийн гэгээн дурсгалд зориулж дарханчууд хүүгийн нэрээр нэрлэсэн дүүжин гүүр босгосон аж. Э.Мөнхтэнгэр хүүгийн халуун амиараа хамгаалсан 4 настай Э.Энхмөнх дүүд нь БНСУ руу явж эмчилгээ хийлгэх нэн шаардлагатай байгаа тул та бүхнийг хүүд туслаж сайн санааны гараа сунгахыг хүсч байна.

    Хэрвээ та туслахыг хүсч байгаа бол Хаан банкны 5045612755 гэсэн дансны дугаар руу өөрийн сэтгэлийн хандиваа хийнэ үү.
Холбогдох утасны дугаар:  99344320, 96344320