Лос Анжелес: /Зах зээлийн ажиглагч/. Хятадын мөнгөн тэмдэгийг тойрсон асуудал, мэдээлэл шинэ зүйл биш. Хятадын төв банкнаас олон улсын худалдаа, арилжааны гол валют болгохоор АНУ-ын долларын эсрэг бодлого явуулж эхэлсэн. Олон улс дахь долларын ноёрхлоос сэргийлж шуурхай түвшний арга хэмжээ эхэлсэн.

    Ам.долларын уналт нь Хятадын валют хүчирхэгжихэд асуудалгүй гэсэн дохио болж байна. Хятадын олон улс дахь валютын бодлогыг АНУ үл хайхран, юан бол хямдхан валют гэж тодорхойлсоор.

    АНУ-ын энэ хандлагад Хятад дургүйлхэж байна. Олон улсын шинжээчдийн дүгнэлтээр Хятадын шатахуун, түүхий эдийн хэрэглээ, хөдөлмөрийн зах зээлийн үнэлгээ гээд бүх үзүүлэлт нь өсөлттэй. Тус улсын эдийн засгийн өсөлт 7 хувьтай байна.

Дэлхий нийтийн энэхүү хандлагыг мэдэрч мөнгөний бодлогодоо өөрчлөлт хийж байна уу гэсэн асуултыг Монголбанкны удирлагаас асуулаа.
Одоогоор дэлхийн валют ам.доллар хэвээрээ байна. Хятадын эдийн засаг хүчирхэгжиж буй энэ үед юан нь бүс нутгийн магадгүй дэлхийн валют болохыг үгүйсгэхгүй. Энэ чиг хандлагатай уялдуулж мөнгөний бодлогоо тодорхойлж, валютын нөөцөө тооцож байна уу?  
Дэлхийн улс орнуудын 70 хувь нь валютын нөөцөө ам.доллараар бүрдүүлдэг байсан бол одоо багасч, 60 хувьтай болсон. Хямралд харьцангуй бага өртдөг, эдийн засгийн дархлаа сайтай улс орнуудын валют хүчтэй байна.

    Азийн бүсэд юаны нөлөө ихэсч, Хятадууд юанаа ядаж Азидаа хатуу валют болгох бодлого баримталж эхэлсэн. Гэвч одоогоор Төв банк яаран валютын нөөцийн бодлогодоо өөрчлөлт оруулахгүй, цаг нь болоогүй.

Манай гадаад худалдааны 70-80 хувь нь ам.доллараар явагддаг хэвээрээ. Гэхдээ жил гаруй өмнө гадаад худалдаанд эзлэх юаны хэмжээ 20 хувьтай байсан бол одоо 30 хувь руу дөхөж байна. Манайх дотооддоо ам.долларын дарамтыг багасгах үүднээс Хятадын төв банктай 2011 оноос эхлэн валютуудаа солилцож эхэлсэн.

    ОХУ ч рублиа Европын тэр дундаа зүүн Европын бүсэд хатуу валют болгох бодлого баримталдаг. Манай улсыг алгасаад Хятад, Орос ам.доллараас татгалзаж юаныг юанаар, рублийг рублиар гэсэн худалдаа, эдийн засгийн хамтын ажиллагааг өрнүүлж байна. Бид Оростой рублиар худалдаа хийхэд бэлэн баймаар байгаа ч Оростой рубль солилцох ажил үр дүнгүй байна.