Өнгөрсөн сард буюу дөрөвдүгээр сарын 18-нд Канад улсын хамгийн том уул уурхайн компани болох "Рио Тинто"-гийн удирдлага өөрсдийн хараа, хяналтанд оруулаад байгаа "Айвенхоу Майнз"-ын гүйцэтгэх албан тушаалтнуудыг чөлөөлсөн юм. Энэ дунд "хорт боб" хочит Оюутолгойн 60 гаруй хувийг эзэмших гэрээ хийж чадсан уул уурхайн магнат гэгддэг Роберт Фрийдланд хүртэл гүйцэтгэх захирлын суудлаасаа огцорсон.
    Тэгвэл Р.Фрийдландыг үүрэгт ажилд нь дахин томилсон тухай "Ройтерс" агентлаг мэдээлснийг 24tsag.mn хүргэж байна. Р.Фрийдландыг албан ажлаа өгсөн хугацаанд түүний албыг түр орлож байсан хүн бол Кей Пристли юм. Тэбрээр "Рио Тинто" компанийн Олон улсын зэсийн хэлтсийн санхүүгийн гүйцэтгэх захирал байсан юм. Өөр нэг томилгоо бол "Айвенхоу Майнз" компанийн санхүүгийн албаны гүйцэтгэх захирлын албан тушаал. Энэ суудалд "Рио Тинто" компанийн Очир алмааз, эрдсийн салбарын санхүүгийн болон бизнесийн хөгжлийн гүйцэтгэх захирлаар ажиллаж байсан Крис Вэтмэн ажиллахаар болжээ.

  "Рио Тинто"-гийн энэ хоёр албан тушаалтан "Айвенхоу Майнз" компаний гүйцэтгэх захирлын шалгуурт тэнцэхгүй байсан бололтой. "Рио Тинто"-гийн зүгээс Айвенхоугийн гүйцэтгэх захиралд өөрийн хүнээ томилох гээд байсны гол шалтгаан нь өдөр тутмын үйл явцыг нь мэдэж байх, хяналтаа тогтооход оршиж байгаа юм.
 
  Канадын уул уурхайн акул "Айвенхоу майнз"-ын 50-иас илүү хувийг "Рио Тинто" эзэмших болсноор өнгөрсөн сараас эхлэн тус компаний менежментэд хяналт тавих болсон. Өдгөө "Айвенхоу Майнз" компаний хувьцааг буцаан худалдан авахыг хүлээн зөвшөөрөөд байна. "Айвенхоу Майнз"-ийн хувьцаа өчигдрийн хаалтын ханшаар 1.6 хувиар буурч 11.53 ам.долларт хүрчээ. 2013 оны нэгдүгээр хагас гэхэд Монголын "Оюутолгой" төслийн үйлдвэрлэлд 3.3 тэрбум ам.долларын санхүүжилт хэрэгтэй байгаа юм.