НХХЯ-наас иргэдэд хувьцаа эзэмшүүлэх талаар мэдээлэл хийлээ.  2011 оны УИХ-ын шийдвэрээр "Эрдэнэс тавантолгой ХХК-ийн тодорхой хувийг иргэдэд эзэмшүүлэхээр болсон. 2010 оны хүн, орон сууцны нэгдсэн тооллогын албан ёсны дүнд үндэслэн 536 ширхэг хувьцааг иргэн бүрийн нэр дээр байршуулсан байгаа.

Энэ нь бүрэн хувьцаа эзэмшигч болсон гэсэн үг биш. Брокер, диллерийн мэргэжлийн байгууллагаар дамжуулан данс нээлгэснээр 536 ширхэг хувьцааны бүрэн эзэмшигч болохыг Санхүүгийн зохицуулах хорооны удирдлага мэдээлэл хийлээ.

Одоогоор 738 мянган иргэн дансаа нээлгээд байна. Өөрийн нэрийн данстай болсоноор хувьцааг эзэмших эрхтэй болсон гэсэн үг. Хувьцааг үнэгүй эзэмшүүлнэ гэсэн мөртлөө брокер, диллерийн компаниуд дээр очихоор 5000 төгрөг гээд байна гэж иргэд хэлж байгаа. Энэ нь тухайн компанийн үйлчилгээний хураамж.

Төрөөс энэ хураамжийг битгий ав гэж хувийн байгууллагуудад шаардах эрхгүй гэдгээ илэрхийлсэн юм.  Иргэд хөрөнгийн бирж дээр хувьцаагаа арилжахыг хүсвэл дангаараа биш мэргэжлийн брокер, диллерийн компаниудаар дамжуулан оролцох ёстой гэдгээ ойлгох хэрэгтэй гэдгийг ч хэлж байлаа.

    Хувьцаагаа Засгийн газарт нэрлэсэн үнээр худалдах иргэдийн хүсэлтийг 05 дугаар сарын 20-ны өдрөөр тасалбар болгон хүлээн авах болсон байна.

Энэ хугацаанд хувьцаагаа худалдах хүсэлт гаргаагүй иргэд болон бэлэн мөнгө хэлбэрээр 1 сая төгрөгийн хишиг, хувиа хүртэх хүсэлт гаргаагүй ахмад настан, хөгжлийн бэрхшээлтэй хүүхэд, иргэдийг хувьцаа авах хүсэлтэй гэж тооцох боллоо. Хувьцаагаа худалдах иргэдийн судалгааг 06 дугаар сарын 01-ний дотор гаргахыг сайд НХХ-ийн сайд Т.Гандид даалгажээ.