Долоо хоногийн эхэнд Засгийн газар болон МҮХАҮТ-аас “Топ-150” аж ахуй нэгжийг шалгаруулсан нь цөөнгүй хүний хундага тулгах шалтгаан болсон билээ. Байгалийн баялагаар дэлхийн анхаарлын төвд орсон Монголын тэргүүлэгч аж ахуйн нэгжүүдэд энэ жил яах аргагүй уул уурхайн салбарынхан хүчтэй орж ирж байна. Мөн үүрэн холбоо, нефтийн салбарынхан бусдаасаа давамгайлж байгаа юм.  
   Хамгийн олон буюу 2000 ажлын байр шинээр бий болгосон “MCS” групп жагсаалтын эхэнд бичигдэж байгаа. Харин Өмнөговь аймгийн Овоот толгойн ордыг эзэмшдэг, хувьцаа нь Хятадын “Чайналко” компаний мэдэлд очих магадлалтай болчихоод байгаа “Саусгоби Сэндс” компани шилдэг компаниудын 15-д орж байгаа юм.

   Мөн энэ жагсаалтад УИХ, Засгийн газрын гишүүдийн нэр дээр байдаг эсвэл хувьцаа эзэмшдэг компаниудыг 24tsag.mnтүүвэрлэн хүргэж байна. “Авлигын эсрэг” гэсэн шалгуурыг давсан гэх төрийн өндөр албан тушаалтнуудын бүрэн ба хагас мэдлийн компаниудыг хөрөнгө орлогын мэдүүлэг дээр нь үндэслэн хүргэж байна.

- “Монгол алт” /МАК/ ХХК /2/ НХХЯ-ны дэд сайд Н.Номтойбаяр
- “Бодь групп” /13/ - УИХ-ын гишүүн Л.Болд
-“Скайтель” /19/ - ерөнхий сайд С.Батболд
-  “Ньюпрогресс групп” /21/ УИХ-ын гишүүн С.Бямбацогт
- “Хурд” групп /79/ - УИХ-ын гишүүн Чойжилсүрэн
- “ТБД андууд” /55/ -УИХ-ын гишүүн Д.Тэрбишдагва
- “Сансар кабель”/70/ -УИХ-ын гишүүн С.Баяр
-“Монгол тамхи Со” /40/ – ЗТБХБ-ын сайд Ц.Дашдорж
- “Монполимет” /42/ ЭБЭХ-ний сайд Ц.Гарамжав
-“Говь” /43/ УИХ-ын гишүүн Ц.Батбаяр, Ц.Сэдванчиг
- “Очир төв” /48/ УИХ-ын гишүүн Д.Дамба-Очир
- “Бишрэлт холдинг” /50/ -БСШУ-ны дэд сайд Б.Ундармаа
- Баянгол зочид буудал /97/ УИХ-ын гишүүн Х.Баттулга
- “Ремикон” /116/ ерөнхийлөгч Ц.Элбэгдорж, УИХ-ын гишүүн Д.Одбаяр нарын хувь эзэмшдэг компани багтсан байна.
          Саяхан АН-ын дэд сайд нарын оронд очсон МАН-ын гурван дэд сайдын компаниуд бүгд эхний 50-д толгой цохиж яваагаас харвал МАН хөрөнгө харж томилгоо хийсэн гэдэг нэг талаас батлагдаж байгаа юм. Нийгмийн хамгаалал, хөдөлмөрийн дэд сайд Н.Номтойбаярын “МАК” 2-т, ЭБЭХ-ний дэд сайд Ц.Гарамжавын “Монполимет” 42-т, БСШУ-ны дэд сайд Б.Ундармаагийн “Бишрэлт холдинг” 50-д бичигджээ.
   Эдгээрээс гадна архины үйлдвэрлэл эрхэлдэг “АПУ” /9/, “Жем интернэйшнл” /14/, “UFC” /75/, “Алко” /77/ зэрэг компаниудын үйл ажиллагаа өдрөөс өдөрт өргөжиж байгаа юм. Мөн төрийн өмчид байдаг Дарханы төмөрлөгийн үйлдвэр, Дулааны III цахилгаан станц, Төвийн бүсийн цахилгаан дамжуулах сүлжээ, Дархан дулааны цахилгаан станц, Монгол шуудан, Эрдэнэт Булганы цахилгаан түгээх станц, Геологийн төв лаборатори зэрэг байгууллагууд топуудад багтаж байгаа нь энэ жилийн онцлог байв.