19.00 цаг. Тусгаар тогтнолын ордон. Хайртай бол эргэж хараарай. Энэ бол "Мөрөөдлийн театр"-ийн залуусын тавдугаар сарын 15 хүртэл тоглогдох шинэ жүжгийн тов.
    19.00 цаг. Тусгаар тогтнолын ордон. Хайртай бол эргэж хараарай. Энэ бол "Мөрөөдлийн театр"-ийн залуусын тавдугаар сарын 15 хүртэл тоглогдох шинэ жүжгийн тов. Хавар хайр ирдэг шиг энэ улиралд яг тохирсон Хайртай бол...гэсэн нэртэй энэхүү жүжгийг сурвалжлах эрх авах хүсэлтээ жүжигчин Г.Алтаншагайд хэлэхэд тэрээр дуртайяа хүлээж авсан юм. Хайр дурлал, хонхны баяр, залуусын улирал гэсэн давхар, давхар давхцалтай жүжгийг үзсэн сурвалжлагаа хүргэж байна.
"Мөрөөдлийн театр"-ийнхан жүжигтээ бэлдэнэ.
    Энд олны хэсэгт тоглох СУИС, Сити дээд сургуулийн оюутнууд хувцасаа солино, тэнд жүжигчин Д.Баттөмөр будаг түрхэж, өөрөө өөрийнхөө нүүрийг хувиргана. Залуу жүжигчин О.Дөлгөөн жүжигтээ тоглох бүх бэлтгэлээ хангачихсан бусдыгаа хүлээн сууна. Жүжигчин Г.Алтаншагай продюсерийн үүрэг гүйцэтгэж, энүүгээр тэрүүгээр ажил зохицуулна, бусдаасаа илүү туршлагатай жүжигчин Г.Эрхэмбаяр жүжгээ хурдан эхлэхийг хүлээн нааш, цааш хөлхөнө.
    Зохиолч Ш.Гүрбазар, найруулагч Н.Наранбаатар, "Мөрөөдлийн театр"-ийн жүжигчдийн хамтын бүтээл "Хайртай бол эргэж хараарай" жүжиг залуусын шоугаар эхэллээ. Жүжгийн эхлэл доргио эхэлсэн болохоор эхнээсээ аваад дуустал эрч хүч, хүсэл мөрөөдөл, хязгааргүй хүсэл тэмүүлэл тайзнаас мэдрэгдэж байлаа.


    Жүжгийн нэгдүгээр үзэгдэл. Хонхны баяр нь удахгүй болно. Оюутны ширээнээс амьдралын зам руу алхах залуус нэг нэгнээсээ салан одно гэдэг жаахан харамсалтай. Оюутны дотуур байранд амьдардаг, амьдрал нь тийм ч хангалуун биш гэнэн цайлган, сайхан сэтгэлтэй, тусархүү, жаахан хулчгардуу оюутан Цэлмэгийн дүрийг жүжигчин Д.Баттөмөр бүтээжээ. Харин Г.Алтаншагай эрч хүчтэй, өөртөө итгэлтэй, дэврүүн, аливаа зүйлийг бодитоор биш сэтгэлийн хөөрөл, хүсэл тэмүүлэлдээ хөтлөгдөж хүлээж авдаг оюутан Сайнтөгсийн дүрд тоглоно. Хонхны баяраараа Цэлмэг хар костюм, Сайнтөгс цагаан костюм өмсөж гангарна гэж ярьж, мөрөөдөж байгааг үзэж буй үзэгчид нээрээ л ийм байдаг даа гэж бодохоос л инээд нь хүрнэ.


    Баян хүний нүдээр эгэл жирийн оюутнуудыг нийгмийн хог шаар гэж үздэг болох, зиндаа зиндаагаараа шалгарсан хүмүүс гэх зэргээр өнөөгийн нийгмийн амьдралын бодит байдлыг харуулжээ. Хөнгөн, дэврүүн сэтгэлтэй оюутнуудаар могой бариулж өөрсдөө ард нь үлддэг атгаг сэтгэлт баяны дүрийг Г.Эрхэмбаяр бүтээнэ.

    Нэг жилийн өмнө бичигдсэн, тэр цагаас хойш ажиллаж эхэлсэн энэ жүжигт хүн яагаад чоно болдог вэ, хүн зүрхээрээ амьсгалдаг уу эсвэл гэсэн асуултын хариултыг хэдхэн минутанд олж авах болно.
    Дээдсийн эрвээхэй, өндөр зэрэглэлийн янхан, ажилгүй болгох уу, амьдралгүй болгох уу, өөр хүнтэй унтчихвал яах уу?, хүн амьдралдаа нэг л удаа хуримаа хийх ёстой биз дээ, та хоёрыг алсан ч чадна гэх зэрэг жүжигт гарах үг, өгүүлбэр, үйлдэл, үзэгдэл болгон нь шударга бус байдал, бүтэлгүй гэрлэлт, хууран мэхлэлт, мөнгө хөрөнгө, эрх мэдэл зэрэг асуудлыг хөндөн тавьжээ. Нөгөө талаар хүн зүрхээрээ биш хайраар амьсгалдаг, хайр нэг л өглөө ирдэг, эргээд хараач гэх зэрэг романтик хайр дурлалын ариун нандиныг харуулсан хэсгүүд ч гарна.

    Жүжгийн төгсгөл. Цэлмэг хар костюм өмсчээ. Сараа Сайнтөгсөд өөрийнх нь өмсөхийг хүссэн цагаан костюмыг авчирлаа. Гэвч Сайнтөгсийн нүд...Эргээд хараач, эргээд хараач...Хайртай бол эргэж хараарай.
    Сараа эргэж харах болов уу, Сайнтөгсийн нүд яасан юм бол, хартай мөртлөө хуурамч нөхөр яах бол, Цэлмэг хайраа олох болов уу? эдгээр асуултын хариу, үйл явдлын тайллыг жүжгээс ирж үзээрэй. Жүжигт гаргалгаа гэдэг үг их тохиолдоно. Цэлмэг, Сайнтөгс нар ямар гаргалгаа гаргасан бол? Яриад өгчихвөл сонирхолгүй.

    Том түрийвч, түүн доторх виза картууд, хөгжим, ном, сандал гэх зэргээр тавилгыг зургаар үзүүлсэн оюутны байр, зүрх, сарнай, ягаан өнгөөр илэрхийлэгдсэн тайз засал.  Жүжгийн явцад үзэгчид огтхон ч уйдсангүй, зүүрмэглэсэнгүй, тэднийг албаар алгыг нь ташуулсангүй. Танхим дүүрэн үзэгчид нэг үе инээж, өөрийн эрхгүй алгаа ташиж, зарим үед түгшиж, нөгөө үе ямар хөөрхөн юм бэ, зэвүүн гэдэг нь гэх зэргээр сэтгэлийн хөөрлөө илэрхийлнэ.

    Залуу жүжигчдийн өөрийн амьдран буй орчноо хэрхэн харж, илэрхийлж байгаа нь сэтгэлд нэгийг бодуулж, багагүй ухаарал төрүүлэхүйц жүжгийг уран бүтээлчидтэй ярилцсан юм.

Жүжигчин О.Дөлгөөн:

-Яагаад "Мөрөөдлийн театр"-ыг сонгов?

-Энэ бол сонголт биш. Маш том боломж. Сургуулиа төгсөөгүй, дипломоо ч аваагүй байгаа залуу жүжигчин миний хувьд "Мөрөөдлийн театр"-ын залуустайгаа хамтран жүжгийн гол дүрийг бүтээж байгаадаа баяртай байна.

-Жүжгийн үзэгдлүүдээс чиний тоглох дуртай хэсэг эсвэл ямар үг нь илүү таалагддаг вэ?

-"Тэр хүүхдүүд нь аавыгаа дууриасан зодоонч байгаасай" гэдэг үг. Сараа яагаад ингэж хэлснийг жүжгээс ирж үзээрэй.

Жүжигчин Г.Эрхэмбаяр:

-Драмын теарт жүжигчин байх энэ театрт тоглохын гол ялгаа юу байна? Энэ жүжигт ямар дүр бүтээж байгаа вэ?

-Би Драмын театраас асар олон зүйлийг сурч авсан. "Мөрөөдлийн театр"-т ажиллаж байгаадаа баяртай байна. Энэ жүжигт эсрэг талын баатар буюу хартай нөхрийн дүр бүтээсэн.

Энэ жүжгээр юуг илэрхийлэхийг зорьсон бэ?

-Оюутан насны амьдрал адал явдлаар дүүрэн. Энэ адал явдлын явцад алдаа гаргах тохиолдол бий. Оюутан насаа хайрлаж, алдаа гаргахаас зайлсхийх хэрэгтэй гэдгийг харуулахыг хичээсэн.

Жүжигчин: Г.Алтаншагай:

-Овжин, сэргэлэн атлаа цагаахан сэтгэлтэй залуугийн дүр бүтээхийг зорьсон юм шиг санагдлаа?

-Сайнтөгс бол амьдралыг үргэлж гэрэл гэгээтэйгээр хардаг. Өөртөө итгэлтэй, дурламтгай залуу. Дурламтгай залуу байснаа хайраа гэнэт олж авч байгаа азтай залуу.

-Үзэгчид жүжгийг үзээд юу ойлговол "Мөрөөдлийн театр"-ынхны зорилго биелэх вэ?

-Аливаа зүйл үргэлж тохиолдлын шинжтэй. Заяаны хань, аз, эз бүгд л тохиолдол. Санаандгүй зүйл гэж байдаггүй. Санаандгүй зүйлээс их зүйл урган гардаг гэдгийг харуулахыг зорьсон. Хайр гэнэт л ирдэг. Нэг л өглөө ирдэг гэдгийг энэ жүжгээрээ харуулахыг зорьсон. Хэрвээ хайртай бол заавал ч үгүй эргэж харж байх ёстой. Тэр чигээрээ хэзээ ч нүүрээ буруулаад явж болохгүй. Зүрх сэтгэлээ зориулсан бол хайрынхаа төлөө тэмцэх ёстой. Хайрынхаа төлөө эргээд уучлах орон зайг үлдээж байх хэрэгтэй гэдгийг харуулахыг хичээсэн.

-Жүжиг ямар нэгэн хэв загварт баригдаагүй, чөлөөтэй сэтгэсэн юм шиг?Энэ нь ч үзэгчид таалагдаж, бодит амьдралд ойр байсан болов уу?

Шоу драмын хэлбэрээр тавигдаж буй анхны жүжиг. Драм гэдэг эхлэл, өрнөл, туйл,тайлал, төгсгөлтэй байдаг учраас 1 цаг 40 минутын турш энэ процедурын дагуу явагдсан. Дотроо шоу элементүүд орж байгаагаараа онцлогтой. Гол дүрийн хоёр жүжигчин нь сургуулиа төгсөж буй залуус. Оюутны ширээнээс амьдрал руу хөл тавьж буй залуус. Хонхны баяраа тэмдэглэх гэж буй. Хүний зүрхэн дэх хонх жингэнэнэ гэдэг хамгийн чухал. Тайз заслын өвөрмөц шийдлийг Одко, Сэржээ гэсэн тайзны шинэ залуу зураачид ажилласан.
    Сүүлийн жилүүдэд салалт ихсэж байгаа нь зүрхээ сонсоогүйтэй холбоотой. Зөвхөн санхүү хөрөнгө мөнгө харж эсвэл сэтгэлийн хөөрөлд автсандаа гэрлэсэн нь ихэвчлэн салалтад хүргэдэг гэдгийг найруулагч маань харуулахыг зорьсон.
Хайртай бол эргэж хараарай...6 үзэгдэлтэй, жүжигчдээс тодорхой хэмжээний ур чадвар шаардсан, үзэгдэл болгон өөр өөрийн гэсэн өнгө төрхтэй энэхүү жүжиг таны сонирхлыг татна.