МАХН-ын дарга Н.Энхбаярыг ШШГЕГ-ын харьяа цагдан хорих 461 дүгээр ангид авчрах гэж байна. Учир нь тэрээр өчигдөр өлсгөлөн зарласнаас болж, өнөөдөр биеийн байдал нь эрс муудсан юм. Харин түүний ар гэрийнхэн болон өмгөөлөгчид нь хоёрдугаар эмнэлэгт хэвтүүлэх шаардлага тавьсан ч ийнхүү цагдан хорих 461 дүгээр төвийн эмнэлэгт хэвтүүлэхээр болсон юм. Энэ талаар Н.Энхбаярын өмгөөлөгч О.Баасанхүү “Бид уг нь хоёрдугаар эмнэлэгт хэвтүүлэх шаардлага тавьсан. Гэвч ШШГЕГ-ын харьяа цагдан хорих 461 дүгээр төвийн эмнэлэгт хэвтүүлэхээр болсон. Тус төвийн эмнэлгийн тоног төхөөрөмж нь ямархуу, эмчилгээ үзлэг хэр сайн хийгддэг эсэх нь асуудал болоод байна” гэв. Мөн тус төвийн эмнэлэгт долдугаар сарын 1-ний хэрэгт буруутгагдаад буй цагдаагийн экс дарга нар хэвтэн эмчлүүлж байсан ч биеийн байдал нь улам муудсан учир өнгөрсөн лхагва гаригт ЦЕГ-ын даргын үүрэг гүйцэтгэгч асан, хошууч генерал Ч.Амарболд, дэд хурандаа О.Зоригт нарыг Н.П.Шастины нэрэмжит эмнэлэг, клиникийн гуравдугаар эмнэлэгт хүргэсэн билээ.
ШШГЕГ-ын харьяа 461 дүгээр төв нь өнгөрсөн онд ашиглалтад орсон ба уг ангид сэжигтнээр татсан хүмүүсийг саатуулдаг юм. Мөн өнгөрсөн хоёрдугаар сард 200-300 хүний багтаамжтай шүүх хуралдааны танхим байгуулсан. Уг танхимд онц хүнд, олон холбогдогчтой хэргүүдийн шүүх хурлыг явуулдаг юм.
Б.Чимэг
