Монгол улсын ерөнхийлөгч асан Н.Энхбаярыг өчигдөр орой Төв аймгийн урьдчилан хорих төвөөс шүүхийн шийдвэр гүйцэтгэлийн албан хаагчид, хуягууд өргөөд машинд суулгав. Бас түүнийг машинаас өргөөд ШШГЕГ-ын харъяа цагдан хорих 461 дүгээр ангид өргөөд оруулчихав. Түүнийг хөлөөр нь гишгүүлсэнгүй. Зугтаачихна гэж бодсоно уу, эсвэл тэрээр өөрөө хөл дээрээ гишгэж чадахгүй байсан уу, магадгүй баашлаад байна уу? гэдэг асуулт урган гарч байна. Анх түүнийг баривчлахдаа бор оймстой нь гозолзуулаад өргөөд аваад явчихсаныг Монгол даяараа харсан. Тиймдээ ч араас нь,
“Дан оймстой гарсан юмсан,
Даараа болов уу яагаа бол,
Даанч биднийгээ зовоосон юмсан,
Жаргаа болов уу яагаа бол” гэсэн дуу гаргасан билээ.
   Ийнхүү Монгол улсын ерөнхийлөгчөөр ажиллаж байсан эрхмийг газар ч гишгүүлэхгүй хатуу чангаар цагдаж байгаа бололтой. Энэ байдлыг харсан МАХН-ын гишүүд, дэмжигчдээс гадна олон нийт ч асуудалд таатай хандахгүй байна. Н.Энхбаярыг өрөвдөх хандлага улам нэмэгдэж эхэллээ.
    Н.Энхбаярыг хорих, шилжүүлэхтэй холбоотой энэ байдлыг харсан зарим нэгэн түүнийг газар гишгэх хувьгүй болсон, гэмт хэрэгтэн гишгэх газаргүй зэргээр тавлан ярих нь ч байна. Уг нь төрөө дээдэлдэг монголчууд ерөнхийлөгч байсан хүндээ ингэж хандах нь зөв эсэхийг хэлж мэдэхгүй. Ямартаа ч ийм үйл явдал ард түмний нүдэн дээр болж байна.