МАХН-ын дарга Н.Энхбаяр өнгөрсөн баасан гаригаас эхлэн өлсгөлөн зарласан ч өчигдөр үүрийн 05.00 цагт биеийн байдал нь муудсан. Тэрээр 36 цаг өлсгөлөн зарласны эцэст ийнхүү биеийн байдал нь муудаж, шоконд орсон юм. Гэвч эх сурвалжийн мэдээлснээр, тэрээр хоригдсоноосоо хойш дан цагаан хоол идсэн бөгөөд оройн хоол иддэггүй байсан байна. Тэгэхээр оройн хоол иддэггүйгээс үзвэл түүний хуурай өлсгөлөн өдгөө 48 цаг гаруй үргэлжилсэн байна. Эмч болон эрүүл мэндийн байгууллагынхан хуурай өлсгөлөн 48 цаг үргэлжлэхэд л эрүүл мэндэд сөргөөр нөлөөлдөг гэдгийг сануулсаар байгаа юм. МАХН-ын удирдлага болон гишүүд, дэмжигчид түүнийг хоёрдугаар эмнэлэгт эмчлүүлнэ, харин Төв аймгийн урьдчилан хорих төвийн удирдлагууд түүнийг ШШГЕГ-ын харьяа 461 дүгээр ангийн нэгдсэн эмнэлэгт хэвтүүлнэ гэсэн билээ. Бүтэн өдрийн турш аль эмнэлэгт шилжүүлэх асуудал яригдсаны эцэст орой 21.00 цагийн үед түүнийг ШШГЕГ-ын харьяа цагдан хорих 461 дүгээр ангийн нэгдсэн эмнэлэгт шилжүүлсэн юм. Түүний эмчилгээг Эрүүл мэндийн сайдын тушаалаар байгуулагдсан хоёрдугаар эмнэлгийн дарга Н.Баясгалангаар ахлуулсан баг эмчилгээг хариуцаж байгаа бөгөөд гардан эмчилгээ нь 461 дүгээр төвийн эмнэлгийн мэдэлд шилжсэн байна.
Шилжүүлэхээс өмнө түүнийг эхнэр О.Цолмон, хүү Н.Батшугар нартай нь уулзуулсан хэмээн хэвлэлээр мэдээлсэн. Мөн 20 минут уулзуулсан хэмээн эх сурвалж мэдээлсэн юм.
Энэ талаар Н.Энхбаярын өмгөөлөгч О.Баасанхүүгээс тодруулахад, “Н.Энхбаярыг эхнэр хүүхэдтэй нь уулзуулаагүй. Яагаад уулзуулаагүй гэдгийг ШШГЕГ-аас асуу” гэв. Харин ШШГЕГ-ийн Олон нийттэй харилцах албаны ажилтан Н.Баясгалангаас тодруулахад “Уулзуулахгүй байх шалтгаан байхгүй. Н.Энхбаярыг АТГ-аас газраас баривчлах шийдвэр гаргасан. Тэгэхээр АТГ-аас уузлуулах зөвшөөрөл өгвөл уулзуулна. АТГ-ийн шийдвэрээр уулзуулах, уулзуулахгүй байх асуудлыг шийднэ” гэх хариултыг өгсөн юм. Юутай ч О.Цолмон нөхөртөөгөө уулзвал, эмчилгээ хийлгэж, биеэ эмчлүүлэхийг нэн түрүүнд зөвлөнө гэсэн байр суурьтай байгаа аж. Б.Чимэг
