24tsag.mn сайтын “Фото Мисс” тэмцээний дөрөвдүгээр сарын шалгаруулалтанд түрүүлсэн фото мисстэй танилцана уу. Тэрбээр  Их монгол радио 99,7, Нандин Фм 105,5-ийн захирлаар ажилладаг. Олон саналаар бусад оролцогчдоос илүү байсан О.Цацралд дэлхийд алдартай “Космополтиан” сэтгүүл шинэхэн дугаар, захиалгын эрхийн бичгээ гардуулсан юм.

- “Фото мисс” тэмцээний дөрөвдүгээр сарын ялагч болсонд баяр хүргэе. Ямар бүсгүй энэ тэмцээнд түрүүлсэн бол гэж хүмүүс сонирхож байгаа байх. Өөрийгөө танилцуулна уу?
- Намайг О.Цацрал гэдэг. Би радиогийн салбарт ажиллаад 10 жил болж байна. Анх 7-р ангийн жоохон охин байхдаа ажлын гараагаа эхэлсэн. Би ШУТИС, дараа нь Радио телевизийн дээд сургуулийг төгссөн. Малайзын Санвэй их сургууль, Германы “Дойчи Велл” академийн мэргэжил дээшлүүлэх сургалтанд суусан. Залуу хүний хувьд боловсролдоо илүү анхааръя гэж боддог энгийн нэг эмэгтэй байна.

- Энэ тэмцээний талаар хаанаас мэдээлэл авсан бэ?
- “Фото мисс” тэмцээний талаар найзаасаа сонссон. Би саяхан хамгийн хайртай хүн болох ээжийгээ алдсан. Ээж минь намайг жоохон байхаас л эхлээд зурган дээр хөөрхөн гардаг юм чинь фото чиглэлээр явбал, авъяастай юм чинь кинонд тогловол гээд их ярьдаг байсан. Би тэр чиглэлээр яваагүй. Гэхдээ өөрийгөө радио, урлагийн чиглэлээр явж байна гэж бодож байна. Би жүжигчин болон фото зургийн чиглэлээр нэг ч тэмцээнд орж байгаагүй. Ийм тэмцээнд оролцох нь ээжийн маань сүүлийн хүсэлтүүдийн нэг байсан. Тийм учраас нэг ч гэсэн хүслийг нь биелүүлэх юмсан гэж боддог юм билээ. Тэрнээс шагнал авъя гэж бодоогүй, чухал байгаагүй. Ээжийнхээ хүслийг бага ч гэсэн биелүүлэх хүслээр энэ тэмцээнд зургаа илгээсэн.

- Эхний шатны шалгаруулалтанд тэнцсэн гэдгээ сонсоод юу бодогдож байв?
- Ээж минь намайг харсан юм шиг санагдсан. Түүнээс биш надад ямар ч туршлага байхгүй шүү дээ. Хичээл, ажил гээд завгүй байдаг, энгийн амьдралын төлөө зүтгэж яваа эмэгтэй. Тиймээс миний охин зориглосон юм чинь гээд ээж минь эхний шатандаа ч гэсэн түрүүлээрэй гэж урам зориг өгч байгаа юм болов уу. Ийм сонирхолтой тэмцээн зохиож байгаа танай хамт олонд баярлалаа. Дэмжсэн бүх хүмүүст баярлалаа.

- Фото тэмцээнд түрүүлэхэд бас өөрийн чинь гадаад төрх нөлөөлсөн. Ер нь гадаад төрхөндөө хэрхэн анхаардаг вэ?
- Одоо цаг үед ямар ч хүнийг гаднаас нь хараад дүгнэдэг болсон. Эхлээд хувцсаар нь угтаад, ухаанаар нь үднэ гэдэг. Хүнийг дээрээс нь доош нь хараад энэ хүнтэй яаж харьцах вэ гэдгээ тодорхойлдог болсон байна. Тиймээс аль болох хувцсаа зохицуулж өмсөхийг хичээдэг. Би мэргэжлийн стилист биш учраас зөвлөгөө өгөхөд хэцүү байна.

- Сэтгүүлч, урлагийн салбарын хүмүүсийг царайгаар нь дүгнэх хандлага байдаг?
- Царайнаас илүү ажилдаа бүх зүйлээ зориулж чаддаг байх хэрэгтэй л гэж боддог. Сайн сэтгүүлч бол сайн мэдээ бичдэг, мэдээллээ хүмүүст хүргэж чаддаг байх хэрэгтэй. Үнэхээр царайлаг байлаа гээд хөтлөлт хийж чаддаггүй, мэдээ мэдээллээ бэлтгэж чаддаггүй хүмүүс байдаг. Мэдээж гадаад төрхөндөө анхаарах ёстой л доо.

- Таны хамгийн дуртай ажил, хобби юу вэ?
- Миний хамгийн дуртай ажил бол радио. Гэхдээ телевизтэй холбоотой ажилладаг болохоор хүссэн хүссээгүй телевизээр гарах үе байна.  Би усанд сэлэх их дуртай. Сүүлийн үед ажил, хичээлийн хажуугаар усанд сэлэх, бассейнд явах зав гарахгүй байна л даа. Усанд сэлснээр хүн гоё галбиртай, эрүүл чийрэг болдог.  Би жоохон байхаасаа Хөвсгөлд, Дэлгэрмөрөнгийн голд сэлж өссөн.  Бас төгөлдөр хуур тоглох дуртай. Багадаа ээжтэйгээ хамт төгөлдөр хуурын хичээлээ хийдэг байсан. Нарийн мэргэжлийн болохгүй ч ямар ч гэсэн дамжаанд явна гээд төлөвлөчихсөн  байна.

- Төгөлдөр хууртай холбоотой хамгийн сайхан дурсамж тань юу вэ?
- Миний хамгийн сайхан дурсамж ээжтэй минь холбоотой. Багадаа ээжтэйгээ хамт төгөлдөр хуурын дамжаанд явж, төгөлдөр хуур сурч байсан нь хамгийн сайхан дурсамж.

- Өнөөдөр та улаан даашин, улаан гуталтай иржээ. Энэ таы зан чанарыг илэрхийлэх үү?
- Тийм ээ. Би тод, улаан өнгөнд дуртай. Би хувьдаа дайчин, шургуу байхыг хичээдэг.

- Ажил, сургууль гээд энэ олон зүйлийг амжуулах урам зоригоо юунаас авдаг вэ?
- Би багаасаа янз бүрийн ажил хийж байсан. Үйлчлэгч хүртэл хийж байлаа. Оюутан байхдаа дотуур байрныхаа шалыг угаагаад сарын 5000 төгрөгөөр  долоо хоногийн хоолоо авдаг байлаа. Бас давхар өөр газар үйлчлэгч хийгээд, радиод хөтлөгчөөр ажилладаг байсан. Жоохон хүүхэд байсан болохоор найзуудаасаа ичээд хэлдэггүй байсан. Одоо бодоод байхад ичих зүйл байхгүй байсан юм шиг санагддаг. Хүн ямар ч ажлыг голохгүй хийх ёстой л гэж боддог. Амьдрал өөрөө надад шургуу байх урам зориг өгдөг.

-  Найз залуутай юу?
-  Найз залуутайгаа хамт зургаан жилийг өнгөрөөлөө. Намайг дэмжиж, тусалж, түшиг болдог сайхан залуу бий.

- Ярилцсанд баярлалаа./