Баасан гарагийн шөнө манай хүчний байгууллагынхан дахин нэг шалгалтад бүдрэв. Хуурай өлсгөлөн зарласны улмаас Н.Энхбаярын даралт нь хэлбэлзсэн, биеийн байдалд нь өөрчлөлт орсон байна. Харин экс ерөнхийлөгчийн тухай тоймтой мэдээллийг ШШГЕГ-аас хэн ч өгч чадаагүйн улмаас Төв аймгийн мөрдөнгийн гадаа 4 сарын 12-ны шөнийн “Элдэв зураг” давтагдлаа.Эрүүл мэндийн яамнаас томилогдсон эмч нарын баг, саатуулах байрны удирдах ажилтны хэн нь ч Н.Энхбаярын гэр бүл болон намын нөхдөд төдийгүй ntv, TV9-өөр үйл явдлыг ажиглаж байсан олон нийтэд тодорхой, ойлгомжтой мэдээлэл өгч чадахгүй байв. Нүүрээ халхалсан шүүхийн шийдвэр гүйцэтгэлийн ажилтнууд, мэдэн будилах дарга, хашаа тойрон зугтсан эмч нар, харанхуйд уймарсан дэмжигчид, улангасан зандрах О.Цолмон... Нийслэл хот баасан гарагийн үдшийн наргианыхаа дараа бөх нойрондоо дугжирч байхад Төв аймагт болсон шөнийн үйл явдлын ерөнхий дүр зураг ийм байв.
Хамгаалалтын 7 залууг О.Цолмон ганцаараа дайрч сэтлээд “Алчихсан юм байна шдээ. Юугаа харсан юм бэ? Ороод ирцгээ!” гэж уриалжээ. Түүний командаар Чимэдсүрэн нарын МАХН-ын дэмжигчид хамгаалалтад байдаг хориотой зурвас руу нэвтэрч саатуулах байрны төмөр хаалганд тулж очсон байна. Тэрээр Төв аймгийн урьдчилан хорих төвийн офицерийн нүүрэнд нүүрээ тулгаж байгаад:
- Нүд рүү хар! Энхбаяр амьд уу? Нүд рүү харж байгаад хэл дээ. Үхсэн үү? гэж чанга дуугаар асуужээ. Харин экс тэргүүн хатагтайд ээрүүлж балмагдсан офицер “Зүгээр, зүгээр...”, “Амарч байгаа...” зэрэг үгсийг зориг муутайхан хариулах мөртлөө теле камераас нүүрээ халхалж байлаа.
24tsag.mn
