Монголын талаас хил зөрчин орж ирсэн өлсгөлөн, айж сандарсан нялх амьтныг Оросын хилийн Хиагт орчмыг хариуцдаг хилчид олж авчээ. Ээж нь амиа алдаж, төөрч будилсан бамбаруушийг хилчид Хиагт районы дарга Валерий Цэрэнпиловд хэрхэхийг мэдсүгэй хэмээн хүлээлгэн өгсөн байна. Гуравхан сартай бамбарууш ойд биеэ даагаад амьдарч чадахгүй тул Цэрэнпилов дарга Константин Борисов хэмээх айлд Монголоос ирсэн “зочныг” түр үрчлүүлжээ.

   -Бамбаруушийг цаашид хэрхэхийг шийдтэл эднийд байрлуулах боллоо. Улаан Үдийн угсаатны зүйн музейд шилжүүлэх талаар ярьж үзсэн ч “орон тооны илүүдэлтэй” байгаа гэсэн хариу ирээд байна гэж Хиагтын дарга Валерий Цэрэнпилов мэдэгдэв.
   Хил зөрчигч шинэ гэртээ үнээний шинэ сүү уусан шиг амарч байна. Гэрийн эзэгтэй угжих гэж үзсэн боловч сүүндээ цацаад байгаа тул тавганд хийж өгдөг болжээ.
   -Шууд хүрч ирээд сүүгээ уухгүй шүү дээ. Биднийг явсны дараа ганцаараа уудаг. Ээжийгээ л санаад байдаг бололтой юм гэж гэрийн эзэгтэй Ирина Борисова ярьж байна.

   Эднийд ирсэн гурав хоногийн хугацаанд монгол бамбарууш тосгоны од болжээ. Том хашааны буланд байх саравчинд амьдарч байгаа бамбарууштай зурагаа авахуулах хүмүүс тасрахгүй байгаа ч гэрийн эзэн хүмүүсийг хэтэрхий ойртохыг зөвшөөрөхгүй байгаа ажээ. “Араатан л бол араатан шүү дээ” гэж тэр анхааруулж байна.
“Бүр болохгүй бол тайгын “иргэн”-ийг нь Монгол руу албадан гаргах асуудал нээлттэй байгаа” гэж Буриадын хэвлэлүүд бичжээ.