Нью Йоркийн “улаан төв” Брүүклинд “МишМэш” (MishMash) хэмээх кафед бууз зарж буй эмэгтэй интернэтээр ингэж “хашгирч” байна.
    Америкт цагаачлан гарсан буриад хүн болох Рыгжита Балданова (Балдангийн Рэгзэд)  гэдэг биологич бүсгүй дэлхийн нийслэл болсон энэ том хотод амьдардаг монгол туургатнуудад нутгийнх нь хоолыг амсуулах гэж ийм санаа сэджээ.  Тэрээр Москвагийн Улсын их сургууль төгсөж, ус төрөгчийн түлш бүтээхээр ажиллаж байв. Одоо тэр шүүс нь гоожсон халуун буузныхаа сурталчилгааг интернэтээр цацаж байна. Америк бууз үхрийн махтай бөгөөд удахгүй хонины махан буузтай болохоор төлөвлөжээ.  2005 оноос Вашингтонд монголчууд мөн буузны газар ажиллуулж эхэлсэн юм.

   “МишМэш” кафегаар өдөрт 300-350 хүн үйлчлүүлдэг, сардаа 20 мянган долларын ашигтай ажилладаг болохоор буузанд “шатна” гэж тэр айхгүй байгаа юм. Таван буузтай нэг орц хоол 5 долларын үнэтэй. Энэ нь Улаанбаатарын хэмжүүрээр үнэтэй, Улаан Үдийнхээр дундаж, Америкийн жишгээр хямдад орох үнэ. Гэхдээ Рыгжита эх нутгаа санасан хүмүүсийн уулзах шалтгааныг л нэмэхийг хүсч байгаагаас биш хэтэвчээ зузаалахыг тэргүүн зорилго болгохгүй гэлээ. Түүнтэй өөр салбарт хамтарч ажилладаг түнш нь энэ цайны газрын эзэн юм санж.

   -Кафены эзэн шинэ санаа, элдэв туршилтад дуртай хүн болохоор бууз зарах санааг минь эелдгээр дэмжсэн. Хоол бэлтгэх явцыг би өөрөө биечлэн хянаж байгаа. Эндхийн буриадууд дундаас бууз чимхдэг хүн олж авах гэж байгаа. Одоогоор буузан дээр маань нэг л хүн ажилладаг гэж Рыгжита Балданова ярьж байна.
Нью Йорк төдийгүй нийт Америк дахь монгол, буриад, халимагуудад энэ цайны газрын сурталчилгаа хүрчээ. Хөрш Нью Жэрси мужийн америк нөхөд нь хүртэл удахгүй захиалга өгөх болно гэжээ. Энэ долоо хоногт ланч тайм буюу цайны цагаар “МишМэш”-д буузны танилцуулга хийж, үнэгүй амталгаа явагдах юм.

   -Энд голдуу бэлэн болсон хоолыг гэртээ захиалж авдаг юм шүү дээ. Америкчууд бидэн шиг гэртээ хоол хийгээд байдаггүй. Эрэлт гайгүй байх юм бол хотын бүх дүүрэгт салбараа нээнэ. Гэхдээ би нийтийн хоолны хүн биш болохоор мэргэжлийн хүмүүс урьж таарах биз гэж Рыгжита хэллээ.
   Түүний төлөвлөснөөр “МишМэш” кафены цэсэнд удахгүй “Нүүдэлчний өдрийн хоол” нэмэгдэх болно. Буузнаас гадна бүхэл мах, сүүтэй цай...