Зуу хүрэхгүй хоногийн дараа эхлэх гэж байгаа Лондонгийн олимпын цуурай ойртсоор. Манай тамирчид ч цөөнгүй олимпын эрх авч, монголчуудыг баярлуулаад байгаа билээ. Дахин олимпын аварга төрнө гэсэн хүлээлт ч хаа саагүй байна. Монголын Оюутолгой ордын алтаар хийсэн медалийг бахархалтайгаар энгэртээ зүүнэ гэсэн мөрөөдөлтэй тамирчид олон байгаа юм. Гэтэл Оюутолгойгоос олборлосон алтаар хийсэн гэх медаль асуудал дагуулж эхлээд байна.

   Оюутолгойн алтны хольцтой гэх Лондонгийн олимпын медаль нь 1,2 хувийн алтны хольтцой бөгөөд олимпын түүхэн дэх хамгийн өндөр өртөгөөр бүтсэн, хамгийн том хэмжээтэй гэдгээрээ онцлог болсон. 400 гр жинтэй, 88 мм-ийн диаметртэй эдгээр медалиудын дээжийг өнгөрсөн сараас Британий музейд нандигнан хадгалах болсон юм. 

   Гэтэл зарим хүмүүс Оюутолгойн ордын олборлолт эхлээгүй байхад чухам яаж, ямар алтаар дээрх медалиудыг хийсэн бэ гэдэг асуудлыг хөндөж эхлээд байна.
  Оюутолгой ордын зэс, алтны олборлолт аль аль нь 2013 оны намар эхэлнэ гэсэн хүлээлт дэлхий нийтэд байгаа. “2013 оны намар эхэлнэ” гэсэн өгүүлбэрийг Оюутолгойн тухай ямар нэгэн мэдээлэл цацахдаа гадныхан зайлшгүй дурддаг билээ.
    Ийм байхад Лондонгийн олимпын медаль Монголын Оюутолгойн алтаар хийсэн гээд сурталчилаад байгаа нь ямар учиртай вэ? Олимпыг дэмжигч, ивээн тэтгэгч гэж рекламдаад байгаа “Рио Тинто”-гийн PR уу, эсвэл үнэхээр Оюутолгойгоос алт олборлоод эхэлчихсэн юм уу гэдэг нь ойлгомжгүй байгаа юм. Тиймээс “Иргэдийн Альяанс” төвийн тэргүүн Т.Занаа зэрэг төрийн бус байгууллагынхан энэ асуудлыг хөндөж тавихаар зохих байгуулагуудад нь хандаж эхэлжээ.
   Өмнөговийн Оюутолгой ордын олборлолт эхлээгүй байгаа гэдгийг Олон улсын Олимпийн хороо анзаараагүй байна гэдэг нэг л үнэмшилгүй сонсогдож байгаа юм. Аль эртнээс төлөвлөж, загвар дизайныг нь гаргаж хийгээд дуусчихсан хойно нь ийм асуудал сөхөгдөж байгаа нь хачирхалтай. Үнэхээр Монголын алтаар хийсэн байлаа гэхэд хил, гаалиар хэрхэн гарсан тухай мэдээлэл одоогоор алга. Тиймд ойрын хугацаанд Рио Тинто, Оюутолгой, олимпын медалийг тойрсон маргаан ширүүн өрнөж магадгүй болоод байна. "Олборлож эхлээгүй Оюутолгойн алтаар олимпын медаль хийх үлгэрийг хэн зохиосон бэ?" гэдэг асуулт хүнд зэмлэлтэй хамт эзнээ хайж байна.