Намуудад олны танил болсон эмэгтэйчүүд тун цөөхөн байдгийг ойрын өдрүүдэд мэдэрч байгаа бололтой. Жендер, хүний эрх, эмэгтэйчүүдийн саналыг авахын тулд ийм өндөр босго тогтоосноо эрхэм хууль тогтоогчид ойлгож ядан, буруугаа бие биедээ чихэж эхэлжээ.

  УИХ-ын сонгуулийн хуулиар намуудын нэр дэвшигчдийн 20 хувь нь эмэгтэй байхаар хуульчлагдсан. Энэ нь 76 нэр дэвшигчийн 15 нь эмэгтэй байна гэсэн үг юм. Харин 15 эмэгтэйгээ 48 тойрогтоо нэр дэвшүүлэх үү, листийнхээ 28-д оруулах уу гэдэг нь тухайн намын хэрэг болно. Гэвч намуудад олны танил болсон эмэгтэйчүүд тун цөөхөн байдгийг ойрын өдрүүдэд мэдэрч байгаа бололтой. Жендер, хүний эрх, эмэгтэйчүүдийн саналыг авахын тулд ийм өндөр босго тогтоосноо эрхэм хууль тогтоогчид ойлгож ядан, буруугаа бие биедээ чихэж эхэлжээ. Одоо нэгэнт батлагдсан хуулийг өөрчлөх боломжгүй учир намууд эмэгтэйчүүдээ олох гэсэн хэцүү ажлыг шуурхайлан хийж байна. Боловсон хүчнээрээ хахаж цацсан гэгддэг МАН-д ч энэ нь том асуудал болжээ. Эцэстээ хүмүүс бага таньдаг ч хамаагүй эмэгтэй хүнийг олж нэр дэвшүүлье гэж ярьцгааж байгаа аж. Тиймээс энэ жилийн УИХ-ын сонгуульд хүмүүсийн инээдийг хүргэсэн олон эмэгтэй нэр дэвшиж мэдэхээр байна.

   МАН-аас хамгийн сүүлийн байдлаар УИХ-ын гишүүн, НАМЭХ-ны ерөнхийлөгч Д.Оюунхоролыг Завхан аймагт, УИХ-ын гишүүн Д.Арвинг Баянзүрх дүүрэгт, ЭБЭХ-ний дэд сайд Ц.Гарамжавыг Булган аймагт, БСШУ-ны дэд сайд Б.Ундармааг Дорнод аймагт, ерөнхий нарийн бичгийн дарга Б.Батцэцэгийг Баянхонгор аймагт, “Боярсконстракшн” ХХК-ийн захирал Н.Баянсайханыг Өвөрхангай аймагт, ерөнхий сайдын ахлах зөвлөх Б.Долгорыг Өмнөговь аймагт, НИТХ-ын төлөөлөгч Б.Саранчимэгийг Хан-Уул дүүрэгт, МАН-ын нарийн бичгийн дарга, Нийслэлийн засаг даргын орлогч Ц.Цогзолмааг Сүхбаатар дүүрэгт дэвшүүлэхээр шийдвэрлэж байгаа аж. Өөрөөр хэлбэл МАН 9 эмэгтэйг нэр дэвшүүлж, 6 хатагтайг листэнд зоохоор тооцож байгаа бололтой. Листэнд бичигдэх эмэгтэйчүүдэд МАН-ын нарийн бичгийн дарга Б.Сарангэрэл, ЭМ-ийн дэд сайд Ж.Цолмон, ХЗДХ-ийн дэд сайд В.Удвал, ХХААХҮ-ийн сайд Ж.Сауле, “Петровис” ХХК-ий ерөнхий захирал Ж.Оюунгэрэл, НАМЭХ-ны удирдах зөвлөлийн гишүүн П.Анужин нар оржээ. 

   Харин АН-ынхан Төв аймагт АН-ын ҮЗХ-ны гишүүн Ш.Батцэцэг, Сүхбаатар аймагт “Монос” группын дэд ерөнхийлөгч Л.Эрдэнэчимэг, Дорнод аймагт ҮЗХ-ны гишүүн Л.Мөнхцэцэг, Орхон аймагт ерөнхийлөгчийн зөвлөх М.Батчимэг, Дундговь аймагт АН-ын ҮЗХ-ны гишүүн  Б.Ургамалцэцэг, Завхан аймагт “Монгол шуудан” банкны дэд захирал З.Нарантуяа, Говь-Алтай аймаг МҮОНТ-ийн захирал Ц.Оюундарь, Баянгол дүүрэгт НИТХ-ын төлөөлөгч С.Одонтуяа, Баянзүрх дүүрэгт ҮЗХ-ны гишүүн  И.Нарантуяа нарыг урьдчилсан байдлаар ярилцжээ. Энэ ярианд өөрчлөлт орохгүй бол АН 9 эмэгтэйг нэр дэвшүүлж, 6 эмэгтэйг листэнд оруулах аж. Листэнд орох АН-ын эмэгтэйчүүдэд УИХ-ын гишүүн асан Б.Мөнхтуяа, БСШУ-ны дэд сайд асан Ч.Куланда, ерөнхийлөгчийн зөвлөх асан Ц.Оюунгэрэл, Нийслэлийн Ардчилсан Эмэгтэйчүүдийн Холбооны тэргүүн Д.Оюунцэцэг, Сонгогчдын боловсролын төвийн тэргүүн Р.Бурмаа, ерөнхийлөгчийн зөвлөх Ч.Сосормаа нар багтжээ. Хоёр том нам эмэгтэйчүүдээ урьдчилсан байдлаар ингэж ярилцаж байгаа ч гэсэн сонгууль дөхтөл нэлээд өөрчлөлт орох магадалтай юм. Ийнхүү намууд эмэгтэй нэр дэвшигч олох шинэ ажилтай байна. Бусад жижиг намуудад ч нэр дэвшигчдийн 20 хувь эмэгтэй байна гэсэн заалт давж гарахад хүндхэн даваа болжээ.