Дундговьд "босоо" хэмээн өөрийгөө рекламддаг “Мон-Уран” ХХК-ний ерөнхий захирал Б.Наранхүүг монголчууд алдарт шарга азрагаар нь анддаггүй. Энэ эрхэм уул уурхай, газрын худалдаа наймаа, “Анод”-ыг дампууруулсан хэргээр ч бас багагүй танигдсан. Үүнээс гадна бага насны охидыг хүчиндсэн гэх хэрэгт орооцолдож багагүй шуугиулаад авсан ч буруугүй гэдэг нь тогтоогдсон юм. Ийм олон домог болсон хэрэгтэй тэрээр төрөлх нутагт Дундговь аймагтаа нэр дэвших гэж их хичээсэн. Хэрэв нэр дэвшвэл ч гарах нь ойлгомжтой гэж хоёр том намынхан дор дороо ярьж байлаа. Гэвч түүнээс МАН, АН гэсэн хоёр том нам үргэлж зайгаа бариасаар байна. Хэрэв түүнийг нэр дэвшүүлээд нэг суудал авсан байлаа ч сүүлдээ намын рейтингэд нөлөөлөх олон асуудалтай хүн гэж үзжээ.
    Эх сурвалжийн мэдээлж байгаагаар тэрбээр МАН-аас нэр дэвших хүсэлтээ удирдлагад нь хэлжээ. МАН-ын дарга С.Батболд зөвшөөрөхгүй гэдгээ ил тод илэрхийлсэн бол, ерөнхий нарийн бичгийн дарга У.Хүрэлсүх асуудлыг авч хэлэлцэж болох юм гэсэн бололтой. МАН-ын удирдлага нь ийм эрс тэс байр суурьтай болсноос үүдээд тэрбээр АН-аас нэр дэвших хүсэлтээ илэрхийлээд бас л дэмжлэг аваагүй гэнэ. Тэгээд ч нэр дэвшвэл олон хэргүүд нь ард түмний анхаарлын төвд орж, гарах гарцгүй болно. Энэ мэт байдлыг эргэцүүлэн бодож тэрбээр эгч Б.Саранчимэгээ МАН-аас нийслэлд нэр дэвшүүлнэ гэсэн тохироотойгоор Сингапурыг зорьсон гэж эх сурвалж мэдээлэв. Ийнхүү Дундговьд нэр дэвших хүмүүсийн санааг зовоохын зэрэгцээ хоёр том намын удирдлагын анхаарлын төвд байсан Б.Наранхүү нэр дэвшихгүй нь тодорхой болжээ.