Өнөөдрийн байдлаар Сэлэнгэ, Хөвсгөл аймгийн зургаан сумын нутагт 10 түймэр асч, Хөвсгөл, Архангай, Дорнод аймгийн нутагт дөрвөн түймэр цурманд байна. Тодруулбал, Сэлэнгэ аймгийн Түшиг, Цагааннуур, Баянгол сумын нутаг, Хөвсгөл аймгийн Цагаан-Үүр сумын нутагт таван түймэр асч байна. Түүнчлэн тус аймгийн Чандмань-Өндөр, Алаг-Эрдэнэ сумын нутагт түймэр асч байгаа ажээ. Харин Төв аймгийн Борнуур сумын III багийн нутаг, “Сүжигтэй ам” гэдэг газар гарсан ойн түймэр тус аймгийн Батсүмбэр сумын IV багийн нутаг, “Зурамтай” гэдэг газраар нийтдээ 300-320 орчим га талбай хамран ассаныг ОБЕГ, тус аймгийн Онцгой байдлын газар, Аврах тусгай ангийн Ой, хээрийн түймэртэй тэмцэх салбарын бүлгийн албан ахагчид, Борнуур, Батсүмбэр сумын 165 хүн автомашин техник хэрэгсэлтэйгээр ажиллаж цурманд оруулсан байна. Мөн Хөвсгөл аймгийн Арбулаг сумын IV багийн нутаг, “Дөрвөлжингийн ар” гэдэг газар гарсан ойн түймрийг, Архангай аймгийн Жаргалант сумын Зуслан багийн нутаг, “Ажраг” гэдэг газар гарсан ой, хээрийн түймэр, Дорнод аймгийн Баяндун сумын нутаг, Хилийн II заставын хариуцсан 858-859-р тэмдэгтийн чиглэлд “Шивэртийн ам” гэдэг газар гарсан хээрийн түймрийг тус тус цурманд оруулсан байна.Б.Чимэг
