Өнөөдөр өглөө МАХН-ын Н.Энхбаярын хүү Э.Батшугар ХЗДХЯ-ны сайд Ц.Нямдорж, Сүхбаатар дүүргийн ерөнхий шүүгч С.Соёмбо-Эрдэнэ, ШШГЕГ-ын дарга М.Ганхүү, УЕП Д.Дорлигжав, Улсын дээд шүүхийн ерөнхий шүүгч Ц.Зориг нарт захидал хүргүүлжээ. Уг захидалдаа “Монгол Улсын гуравдахь Ерөнхийлөгч, МАХН-ын дарга Н.Энхбаяр 2012 оны тавдугаар сарын 4 өдрийн өглөөний 10.00 цагаас эхлэн хуурай (бүтэн) өлсгөлөн зарлаж эхлээд даруй 72 цаг гаруй буюу бүтэн гурав хоноод байна.
Эрүүл мэнд, Нийгмийн хамгааллын сайд, Хууль зүйн сайдын 1999 оны А/26.10 тоот хамтарсан тушаалын хавсралтад дурдсанаар бүрэн өлсгөлөн зарласанаас хойш 3-6 хоногт үхэлд хүргэх аюултай байдаг гэж заасанчлан шийдвэр гүйцэтгэлийн болон бусад хууль хяналтын холбогдох байгууллагууд шуурхай арга хэмжээ авах үүргээ биелүүлэх шаардлагатай байна.
Төрийн тусгай хамгаалалтад байдаг, Үндэсний аюулгүй байдлын зөвлөлийн гишүүн асан хүний амь нас, эрүүл мэндийг хамгаалах үүрэгтэй хоёрдугаар нэгдсэн эмнэлэгт хэвтүүлэн, эрчимт эмчилгээнд оруулах тухай шийдвэр гаргахыг хүсч байна.
Иймд Монгол Улсын Ерөнхийлөгч асан хүн бүтэн өлсгөлөн зарлаж эхэлснээс хойш гурав хоног өнгөрч байгаа нь түүний амь нас эрсдэх ноцтой, бодитой аюулд хүрээд байгаа тул түүнийг эрчимт эмчилгээнд оруулахыг хүсч байна.
Төрийн эрхшээлд буй монгол иргэний амь нас, эрүүл мэндэд засаж үл болох хор уршиг учирсан тохиолдолд Монголын төр, тэр дундаа хууль зөрчин, шударга бусаар баривчилсан, өлсгөлөн зарласан шаардлагыг үл тоомсорлосон албан тушаалтнуудад хариуцлага хүлээлгэхийг бид шаардах болно.
2012 оны 5 сарын 5 өдрийн /06.30/ эмч нарын дүгнэлтийг хавсаргав.
Хүсэлт гаргасан Н.Энхбаярын гэр бүлийн гишүүн Э.Батшугар” гэжээ.
Б.Чимэг
