МАХН-ын дарга Н.Энхбаяр өлсгөлөн зарласан хэдий ч бие нь муудаж, ШШГЕГ-ын харьяа 461 дүгээр ангийн нэгдсэн эмнэлэгт хэвтэн эмчлүүлж буй. Түүний биеийн байдлыг үхлийн эрмэг дээр ухаангүй байгаа хэмээн МАХН-аас өчигдөр мэдээлэл хийсэн. Харин түүний биеийн байдлын талаар ШШГЕГ-ын Тогтоол гүйцэтгэх газрын хэлтсийн дарга, дэд хурандаа Ц.Очгэрэл “Мэргэжлийн эмч нарын дүгнэлтийг үндэслэж өнгөрөгч бямба гаригт Улаанбаатар хот дахь Цагдан хорих 461-р ангийн нэгдсэн эмнэлэгт шилжүүлэн авчирсан. Энэ эмнэлэгт өөрийг нь үзэж байсан нарийн мэргэжлийн эмч болон бусад эмч нарын бүрэлдэхүүнтэй баг байгуулагдсан. Энэ багийн ахлагчаар хоёрдугаар эмнэлгийн захирал Г.Баясгалан эмч ажиллаж байгаа. Тус эмнэлгийг зохих түвшинд хүрсэн, эмчлэх бүрэн бололцоотой эмнэлэг байна гэдгийг тогтоож, дүгнэлт хийсэн. Өөрөөр хэлбэл мэргэшсэн эмч нартай, тусгай тоног төхөөрөмж, бие даасан дөрвөн давхар байшинтай, төрөл бүрийн тасагтай ийм эмнэлэг. Тус эмнэлэгт шилжүүлэн авчирсны дараа буюу ням гаригийн өглөө өвчтөн маань усанд орж, амарсан. Ням гаригийн үдээс хойш авсан мэдээгээр зохих эмчилгээгээ хийлгэж эхэлсэн. Хүмүүсийн ярьж байгаагаар ухаан алдсан, биеийн байдал нь хүндэрсэн асуудал байхгүй. Иргэн Н.Энхбаярыг өөрийг нь хянаж байсан эмч ажиллаж байгаа. Мөн сувилагч гээд бусад хүн хамтран ажиллах боломж нөхцлөөр нь бид хангаж байгаа” гэжээ. Б.Чимэг
