“Н.Энхбаярын баривчилгаа” хэмээх реалити шоуны дуулиан шуугиан одоо ч намдахгүй харин ч өргөжин тэлэх хандлагатай байна. Энэ шоунаас болж зарим нэгний нэр хүнд унаж, заримынх нь өссөн. Бас зарим албан тушаалтнууд сануулга авсан бол, зарим нь шагнуулжээ. Тэр ч бүү хэл ХЗДХ-ийн сайд Ц.Нямдорж  баривчилгааг мэдээгүй гэж хэлснээсээ болж огцрох дээрээ тулсан. АТГ-ын ажилтнууд муу ажилласан гэж сануулга авсан. Тэгэхээр энэ шоу үнэхээр өргөн хүрээг хамарчээ.

    Шоуны сонин хачин ч дуусахгүй байна. Тухайн үед АТГ-ын арав гаруй тусгай ажилтнууд Н.Энхбаярыг удирдлагын академийн гэрийнх нь гадаа баривчлах гээд бүтэлгүйтсэн юм. Харин Н.Энхбаяр энэ дуулианы үеэр өөрийн хамгаалагч, жолооч хоёртойгоо явж байжээ. Тэднийг отож байсан АТГ-ын арав гаруй тусгай ажилтнууд баривчлах гэж дайраад 40 орчим минут хамгаалагч, жолооч хоёрыг дийлээгүй юм. Үйл явдлыг эргэн сануулахад өөрсдийгөө АТГ-ын ажилтнууд гэж танилцуулсан этгээдүүд Н.Энхбаярыг барих гэснээс болж нилээд асуудал үүссэн байдаг. Энэхүү дуулиант баривчилгааг зөвшөөрөлгүй хийх гэсэн тул жолооч нь төрийн тусгай хамгаалалтын төврүүгээ юу болоод байгааг мэдэгджээ. Төрийн тусгай хамгаалалтын удирдлага нэмэлт хүч аван очих гэтэл замын түгжрэлээс болон 40 минутын дараа удирдлагын академийн байрны гадна буюу хэрэг болдог газар иржээ. Энэ хугацаанд Н.Энхбаярын ганц хамгаалагч, жолооч хоёр АТГ-ын арав гаруй ажилтныг торгоон барьж чадсан юм.

   Харин тусгайгийн нэмэлт хүч, гэр бүлийнхэнийх нь орилоон чарлаан, иргэдийн дэмжлэгээс айсан АТГ-ын тусгай ажилтнууд бутран алга болсон гэдэг. Харин үүргээ гүйцэтгэж чадаагүй АТГ-ын зарим ажилтнууд тусгайгийн удирдлагад Н.Энхбаярыг баривчлах шүүхийн тогтоолыг үзүүлжээ. Энэ үед тусгайгийнхан нэмэлт хүчээ татаж, Н.Энхбаяр ч гэртээ орж бүгжээ. Маргааш нь АТГ-ын удирдлага “Бид Төрийн тусгай хамгаалалтын газарт мэдэгдсээр байтал хамгаалалтаа буулгах битгий хэл бүр хүч нэмэн эсэргүүцсэн” тухай гомдоллосон. Хожим Ц.Нямдоржийг огцруулах чуулганы хуралдаанд дуудагдаж ирсэн Төрийн тусгай хамгаалалтын газрын дарга Л.Батзориг сонирхолтой мэдээлэл хийсэн байдаг. Тэрээр “АТГ-ын удирдлага урьдчилж барвчилгааны талаар бичгээр мэдээлэл өгөөгүй. Харин баривчлах гэж байна гэсэн мэдээлэл сонсоод нэмэлт хүч аваад очиход шүүхийн шийдвэрийг үзүүлсэн. Шүүхийн шийдвэрийг үзээд нэмэлт хүчээ татсан” тухай ярьсан гэдэг.

   Энэхүү дуулиант баривчилгааг саатуулсан хэмээн АТГ-ынхан Н.Энхбаярын жолооч, хамгаалагч хоёрыг ихэд буруутгасан. Харин Төрийн тусгай хамгаалалтынхан хоёр ажилтнаа шагнаж, урамшуулан цол нэмсэн гэж эх сурвалж мэдээллээ. Учир нь хагас цаг илүү хугацаанд бэлтгэгдсэн арав гаруй хүнийг торгоон барьж, үүрэг хариуцлагаа нэр төртэй биелүүлж, төрийн өндөр алба хашиж байсан хүнийхээ аюулгүй байдлыг хамгаалсан гэж үзжээ. Үнэхээр ч тухайн үед олон нийт тийм хугацаанд тийм олон хүнийг тогтоон барьж байсан Н.Энхбаярын хамгаалагч, жолооч хоёрыг магтаж байсан. Ийнхүү тэд цол нэмжээ. Харин Н.Энхбаяр хожим аавынхаасаа гарахаараа өөрийг нь нэр төртэй хамгаалж байсан хамгаалагч, жолооч хоёроо даргын хувьд тусгайлан шагнах биз. Учир нь хамгаалагч, жолооч хоёр нь түүнийг улам илүү нэр хүндтэй болгож, олон түмний анхаарлыг татах боломжийг нээж өгсөн юм.