ОХУ, Франц гэсэн хоёр орны хувьд түүхэнд тод үлдэх үйл явдал өчигдөр тохиолоо. Францын ерөнхийлөгчийн ээлжит сонгуулийн үр дүнгээр таван жил төрийн эрх барьсан Н.Саркози ялагдаж, гэртээ харих болов. Харин Оросын “хаан” В.Путин эргэж ирлээ. Энэ үйл явдал аль аль нь Европ тив, цаашлаад дэлхийн өнгө төрхийг өөрчилж болохыг ажиглагчид хэлж байгаа юм. 59 настай В.Путин, түүнээс хоёр насаар дүү Н.Саркозе нарын түүх нэг өдөр эрс тэсээр бичигдэж үлдлээ. Энэ нь ялагч ба ялагдагч.

      В.Путин “хаан” төрхөндөө оров
    Ерөнхийлөгчийн сонгуулиас хоёр сарын дараа тангараг өргөсөн В.Путин “аян дайнд мордоод эргэн ирж буй хаан мэт” байсан тухай Европын хэвлэлд бичжээ. Өмнө нь найман жил ерөнхийлөгч хэмээн дуудуулж байсан тэрбээр гурав дахь удаагаа ерөнхийлөгч болоход нь хөөр баяр болсон 2000 хүн түүнийг Кремлийн ордонд угтсан. Тэдний дунд Украйны ерөнхийлөгч Виктор Янукович, Италийн ерөнхий сайд асан Сильвио Берлускони нар байсан тухай хэвлэлүүд бичиж байна. Монголын ерөнхийлөгч улаан хивсний ёслолд очиж чадаагүй ч хөрш орны тэргүүний хувьд цаг алдалгүй баярын мэндчилгээ дэвшүүлсэн юм.

      В.Путинтай ойр суухад 15 сая рубль
    30 үхэр буу нижигнэж, түүний үдэшлэгт оролцохын тулд баячууд сая сая рубль цацжээ. В.Путины баярын үдэшлэгт нэр хүндтэй хүний хажууд сууя гэвэл 15 сая рубль төлөх ёстой. Монгол төгрөгөөр тооцож үзвэл энэ нь 667 сая төгрөг, их үнэ. Гэхдээ “хаанаа” угтаж буй баячуудад бол энэ нь юу ч биш аж. Дөрвөн жилийн өмнө В.Путин ямар учраас суудлаасаа бууж байсныг санах хүн өдгөө байхгүй болсон мэт сонгогчид түүнд хандаж байгаа тухай ажиглагчид хэлж байна. Одоо бол В.Путин зургаан жил эзэн сууна. Зургаан жилийн дараа сонгогчид бас л зарим зүйлийг мартсан байна.

    И.Сталинаас  хойш хамгийн олон жил төр барина
   В.Путиныг сонгуулийн санал луйвардсан гэж үзэгсэд Орост олон байгаа. Гэсэн ч тангараг өргөх ёслолын үеэр ердөө л 22 хүн Кремлээс 100 метрийн зайд “Путингүй Орос орон”, “В.Путин бол хулгайч” гэх зэрэг уриа лоозон барьж зогсжээ. Учир нь тангараг өргөх ёслолын өмнөх өдөр “Анти-Путин” хөдөлгөөний 400 гаруй жагсагчдыг нийгмийн эмх замбараагүй байдал үүсгэлээ гэж барьж, хорисон юм. Харин үүнийг ерөнхийлөгчийн тангараг өргөхдөө В.Путин хэн нэгний шидсэн түүхий өндөг, улаан лоольд онуулахгүй гэсэндээ хийсэн үйлдэл гэж цөөн хэдэн хэвлэлүүд бичиж байна. Олонхи нь бол жагсагчдыг цагдаад халдсан хэмээн буруутгаж байгаа. Ерөнхийлөгч болоогүй байхдаа хүртэл ийм нөлөөтэй, өөрийг нь эсэргүүцэгчдийг дарж чадаж байгаа нь Оросын засагт дахин хатуу дэглэм тогтож байгаагийн эхлэл гэх нь байна. Гэхдээ түүнд хүндхэн эдийн засагтай Орос орны хувь заяа нүүр тулж байна. Хямралын шинж тэмдэг илэрсэн энэ үед хатуу гар хэрэгтэй гэдгийг эдийн засагчид хүлээн зөвшөөрч буй. Бусад орны хувьд харьцаж дадсан В.Путины талаар нэг ч муу үг гээхгүй байгаа билээ.


Дэгжин Саркози хэрэггүй, энгийн л байя!
    Францын шинэ ерөнхийлөгч Франсуа Олланд бол Н.Саркозигоос тэс өөр имижтэй хүн. Саркози үнэтэй зүйлд дуртай, хөдөлгөөнтэй хүн. Харин Ф.Олланд бол жирийн төрийн албан хаагчийн энгийн төрхтэй хүн. Ерөнхийлөгч болохоосоо өмнө тэрбээр хүнсний зүйлээ өөрөө цуглуулж, хямд үнэтэй гутал, хослол өмсдөг байсан. Н.Саркози шиг өөрөөсөө залуу эхнэртэй болсон ч тэр нь загвар өмсөгч биш, энгийн нэг сэтгүүлч эмэгтэй.


    Иран: Н.Саркозигоос салсандаа баяртай байна
   Францын ерөнхийлөгчийн сонгуулийн дүн гарсан даруйд Ираний Гадаад харилцааны сайд Рамин Мехманпараст баяртай байгаагаа дуулгажээ. Тэрбээр “Түүний ялагдал Францын Засгийн газар буруу бодлогоор ажиллаж байсныг харуулж байна. Франц шинэ ерөнхийлөгчтэй болсон нь хоёр улсын дайсагнасан харьцааг зөөлрүүлнэ” гэж баярын сэтгэдлээ яаран хуваалцжээ. Гэсэн ч шинэ ерөнхийлөгч Франсуа Олланд мөн л цагаачлалы асуудалд хатуу хандана гэсэн байр суурьтай байгаа юм.

   “Меркози”-гийн төгсгөл үү?
    Дэлхийн нийтийн юун түрүүнд асуултын тэмдэг тавьж байгаа цэг нь Герман, Францын харилцаа юм. Европын эдийн засаг хүнд “өвчтэй” байгаа энэ үед Германы канцлер А.Меркелийн хамтрагч суудлаасаа буусан нь  цаашдын бодлогод нөлөөлөх болов уу гэсэн хүлээлт байна. Грекийн эдийн засгийг өндийлгөж, хямралын халдварыг намжаахад тэд санал нэгдэж байсан. Тэгвэл Саркозигүйгээр А.Меркел асуудлыг давж гарах болов уу, яах бол гэсэн асуултын тэмдэг аль хэдийн хэвлэлийн хуудсанд цухазаж эхэлжээ. Ф.Олланд "дэгжин ноён"-ы орон зай нөхөж чадах эсэхийг таамаглаад хэлчих хүн одоохондоо алга байна.