Монгол төрийн наадамд түрүүлсэн залуу аварга С.Мөнхбат Тувагийн Майн нэгний барилдааны нэгийн даваанд унажээ. Энэ тухай Тувагийн хэвлэлүүд мэдээлсэн байна. Кызылд болсон энэ барилдаанд нутаг ойр тул улсын заан Д.Бумбаяр нарын Увсын голдуу бөхчүүд очиж зодогложээ. Тувагийн тэргүүн Шолбан Кара-оол “Эрчүүд маань зөвхөн зүлэг ногоон дэвжээн дээр эр бяраа үзэлцэж байг! Хэн хүчтэй нь түрүүлэх болтугай!” хэмээн тэмцээнийг нээсэн байна.

   Ахмадын буюу 45-аас дээш насны ангилалд Ө.Тулгаа зааны дүү, улсын начин Ө.Сумъяа түрүүлж ВАЗ-2107 суудлын автомашины эзэн болжээ. Үзүүрлэсэн Геннадий Монгуш мотоцикл гардсан бол шөвгийн дөрөвт үлдсэн тува бөхчүүд телевизор тэврээд харьлаа.

   Харин хүчит 128 бөхийн барилдааны бай шагнал болох 100 мянган рублийг (4 500 000 төгрөг) Кызыл хотын Майдар Монгуш өвөртлөв.  Шөвгийн наймд ганцхан монгол бөх үлдэж чадсан нь Увс аймгийн залуу бөх Ганзориг байжээ. 6500 суудалтай цэнгэлдэх хүрээлэнд хөл тавих зайгүй цугласан бөхийн хорхойтнууд Монголын залуу аваргын барилдааныг шимтэн хүлээж байсан боловч С.Мөнхбат нэгийн даваанд өвдөг шороодсон юм.

24tsag.mn