Вьетнамын хамгийн том хот болох Хо Чи Минхэд мянга мянган ажилчид жагсаж байна. Тэд засгийн газрын шийдвэрийг эсэргүүцэж байгаа бөгөөд зургаа дахь өдрөө ажил хаяж жагсаж байгаа юм. Гутлын үйлдвэрийн ихэнх ажилчдаас бүрдсэн жагсагчид ирэх жилээс хэрэгжиж эхлэх нийгмийн даатгалын хуулийг эсэргүүцэж байгаа аж. Жагсагчид мөн Найк, Адидас брэндийн гутлуудыг үйлдвэрлэдэг Тайван Фу Йен дүүргийн гутлын үйлдвэрийг эзлээд байгаа юм.
Олон мянган жагсагчид үйлдвэрийн ойролцоох гудамжуудыг хаан жагссан учраас хотын удирдлага болон засгийн газрын эрх баригчид ажилчидтай тохиролцох сонирхолтой байна.
Хэзээ ч болж байгаагүй ажил хаялт
Одоо үргэлжилж буй ажил хаялт нь Хо Чи Минх хотын хувьд Вьетнамын түүхэнд хамгийн өргөн хүрээний бас хамгийн урт хугацаанд болж буй ажил хаялтад тооцогдож байна. Тус улсад ажилчид ажлын байрны нөхцөл, цалингийн хэмжээ гэхээсээ илүү Засгийн газрын ажил эрхлэлтийн бодлогыг эсэргүүцэн жагсах нь маш ховор үзэгдэл юм.
Вьентнамын засгийн газар тэрс үзлийг дэмждэггүй тул олон нийтийн жагсаалыг аюулгүй байдал сахиулагчдын хүчээр дарна хэмээн тооцоолж байсан. Гэвч жагсаал эхлээд зургаа дахь өдрөө үргэлжилж байхад одоо хүртэл ямар ч хяналт айдасгүй байна. Тиймээс энэхүү жагсаал цаашид даамжирч хяналтаас гарах боломжтой хэмээн олон улсын мэргэжилтнүүд үзэж байгаа юм.
Нөгөө талаас Хөдөлмөрийн яам нийгэмд эмх замбараагүй байдал үүсэхээс сэргийлж даатгалын бодлогоо эргэн харах магадлалтай байгааг илтгэж байна.
Нийгмийн даатгалын хууль өмнөхөөсөө ямар ялгаатай вэ?
Засгийн газар нийгмийн даатгалаас олгодог ажилгүйдлийн тэтгэмжийг тэтгэврийн тэтгэмж рүү шилжүүлнэ хэмээсэн нь ийнхүү олон нийтийн дургүйцлийг хүргэжээ. Өнөөгийн байдалд Вьетнамын ажил эрхлэгчид сар бүрд хуулинд заасан тодорхой хэмжээний даатгалын хураамжийг төлдөг бөгөөд ажилгүй болсон тохиолдолд ажил хийж байх үедээ төлсөн нийт даатгалын хэмжээтэй тэнцэх их мөнгийг буцаан авдаг юм.
Харин шинэ хуулиар ажилчид ажлаас гарсан тохиолдолд энэхүү их хэмжээний нөхөн олговрыг зөвхөн тэтгэвэрт гарах үедээ буцаан авах ёстой хэмээн заасан байна. Мөн нөхөн олгох даатгалын хэмжээг бөөнд нь бус сар сараар олгох тухай тусгажээ.
Вьентнамд эрэгтэйчүүд 60, эмэгтэйчүүд 55 насанд тэтгэвэрт гарахыг зөвшөөрдөг байна.
Засгийн газар энэхүү шийдвээ ажилчдын төлөө хэмээн тодотгож байна. Харин ажилчид даатгалын тэтгэмжээ тэтгэвэрт гарахдаа бус ажилгүй болсон үедээ авахыг илүү үзэж байна.
Цалингийн хэмжээ бага, ажиллах хүчин залуу гэсэн утгаараа Вьетнам улс нь үндэстэн дамнасан дэлхийн томоохон коропорациудын үйлдвэрлэлийн бүс болдог аж. Тус улсын 90 сая хүн амын ихэнх нь 40-өөс доош насныхан байдаг.
Д.Идэр
www.24tsag.mn