“Долдугаар сарын 1”-ний хэрэгт буруутгагдаад буй цагдаагийн экс дарга нарын биеийн байдал муудаж, хошууч генерал Ч.Амарболд, хурандаа О.Зоригт нар Н.П.Шастины нэрэмжит эмнэлэг, клиникийн гуравдугаар эмнэлэгт хүргэгдсэн. Түүнчлэн хурандаа О.Зоригтын бие хүнд, хөлийнх нь хуруунууд мэдээгүй болж, хошууч генерал Ч.Амарболдын даралт нь хэлбэлзэлтэй байгаа тул эрчимт эмчилгээний тасагт хэвтсэн талаар мэдээлсэн билээ. Тэдний биеийн байдлын талаар тус эмнэлгийн эмчилгээний тасгийн эрхлэгч Ж.Төмөр-Очироос тодрууллаа. -Цагдаагийн экс дарга нар танай эмнэлэгт ирсэн гэх мэдээлэл байна. Биеийн байдал нь хэр байна?
-Ч.Амарболд, О.Зоригт нарын биеийн байдал хүнд байгаа. Ч.Амарболдын хувьд элэгний хатууралтай, ээнэгшлийн бус шатандаа, сахарын хэмжээ эрс ихэссэн. Харин О.Зоригтын хувьд зүрхний титэм судасны хурц дутагдал мөн зүрхний дутагдалтай, сахарын хэмжээ ихэссэн байдалтай байна. О.Зоригтын биеийн байдал эрс муудсан байгаа учраас удахгүй зүрхний хагалгаанд орох байх. Ч.Амарболдыг манай сонгомол эмчилгээний тасгийн эрхлэгч, Ж.Батжаргал, О.Зоригтыг Н.Дамдинсүрэн нар эмчилж байна.
-О.Зоригт хурандаагийн хөл мэдээгүй болсон гэсэн?
-Тийм. Цусан дахь сахарын хэмжээ нь ихэссэнээс хөл нь доголж, улмаар хуруунууд нь мэдээгүй болсон. Ер нь сахарын хэмжээ ихэдхээр үе мөчиндөө ордог. Үүнийг хүнд хэлбэр гэж ойлгож болно.
-Хоригдсоноос хойш танай эмнэлэгт үзүүлсэн гэсэн. Тэр үед яагаад эмчилгээ хийгээгүй юм бэ?
-Сахарын хэмжээ нь ихсээд хөлийн хуруунууд нь хөхөрч хавдаад, доголсон байдалтай ирсэн. Тухайн үед бид хэвтэж эмчлүүлэх шаардлагатай гэдгийг хэлсэн. Гэвч ирээгүй байж байгаад одоо л ирж байна.
-Одоогоор ямар эмчилгээ хийж байна вэ?
-Зохих ном журмын дагуу шаардлагатай эмчилгээг хийж байна.
-Ч.Амарболд генералын хувьд?
-Эмнэлгийн ачаалал их, мэргэжлийн тасагт ор байхгүй учраас түр сонгомол эмчилгээний тасагт хэвтүүлээд байна. Бид энэ талаар авч хэлэлцсэн. Удахгүй тасагт нь шилжүүлээд зохих эмчилгээ, үйлчилгээг цаг алдалгүй авах болно.
Б.Золбоо
